Shillong, Naiwieng 02
Ka jingïaid lynti ka kynhun ïalehkai ka Jylla ka la poi noh sha kaba kut ha ka semi final jong ka Sub-Junior Boys National Football Championship 2025-26 (Tier 2), hadien ba ka la shah rem noh ha ka Telangana da 3-1 kol lyngba ka ‘extra time’ ha ka sngi Saitjaiñ ha Narainpur, Chhattisgarh.
Kane ka kynhun ïalehkai kaba la jop baroh lai sien ïakhun ha ka Group-C na ka bynta ban jam sha ka semi final bad ka Telangana ka la lah ban leh kumjuh ha ka Group-A bad ka la lah ban pynpaw ïa ka jingtbit ha kane ka jingïakhun hashwa ba kan jam sha ka final.
Hadien ba kine ki kynhun ki la ïakhun tyngeh naduh kaba sdang bad haduh kaba kut jong ka kylla step, hynrei ka Meghalaya hapoh ka jingïalam u Bah Dapmon Tariang (coach), ka la ïoh ban pynkhih jar nyngkong eh lyngba u Marbiang Marwein (60). Kane ka long ka kol kaba shiphew ka jong hadien ba u la thep 9 kol ha ka jingïalehkai ‘group’.
Hapdeng kane ka jingïakhun, ka Meghalaya ka la hap ban ïalehkai sa tang shiphew ngut na ka daw ba u Elvin Joe Kharsahnoh u la shah sei da ka red card ha u rephri ha ka minit kaba 72. Te kumta kane ka jingduna rangïalehkai ka la buh jingeh ïa ka Meghalaya ban ïashan tyngeh hakhmat ki rangïalehkai ka Telangana bad dei ha ka minit kaba 80 ba ka la shah pynphai kylla lyngba u Stolzer Kamson.
Lyngba kane ka jingïakhaid haduh kaba kut ki 90 minit, na ka liang ki bor pynïaid ki la ailad biang ba kin ïakhun sa ïa ka ‘extra time’ bad ha ka Telangana ka la ïoh ban thep biang sa ar kol lyngba u Stolzer (110) bad u Mohammed Anas (120+2) bad ban khur syndon ïa ka jingjop. U Stolzer u la ïohpdiang ïa ka nam Player of the Match.
Watla ka la shah rem, pynban kane ka kynhun ïalehkai ka Jylla ka la lah ban pynpaw ïa ka jingtbit. Kane ka pyni ïa ka jingkiew ha ka rukom ïalehkai mynta u snem bad la khmih lynti ba kane ka kynhun kan nangkiew shaphrang ha kiwei pat ki lympung ki ban wan.
