Shillong, Naiwieng 02
Ka khana jong ka jingbym shimkhia ha ka liang ka pule puthi khamtam ha ki kyrdan lower primary ka la paw biang sa shisien hadien ba ka Niksamso Garo Community Organisation (NGCO) ka la pynpaw ïa ka jingsngewkhia halor ka jinglong jingman jong kawei ka ïing skul kaba la julor bad khlem maramot shuh.
Kane ka skul ka dei ka Darang Boldak Government LP School kaba don ha South Garo Hills district, kaba hap hapoh ka Baghmara C&RD Block. Kumba long mynta ka don 21 ngut ki khynnah skul bad arngut ki nonghikai kiba pyndap ïa ki jingdonkam jong ki ha ka pule puthi.
“Ïa kane ka skul la shu ieh kumto ha ka jinglong jingman kaba isangsot bha na ka jingjulor kaba la don la slem bha, hynrei haduh mynta na ka liang ka tnat ba dei peit bad ki bor ba dei peit kim shym la pynpaw satia ban shimkhia ne leh eiei. Wat hapdeng ka jingujor ba bunsien na ki nongshong shnong, hynrei ym shym la don uwei ruh u heh Sorkar uba la leit jngoh ïa katei ka jaka ne ban shimkhia ban maramot ïa ka skul,” ong u president ka NGCO, u Tengrak Marak.
U Tengrak Marak u la bynrap ba ki khynnah skul bad ki nonghikai ki don ha ka jingsngewsynei jong ki bor mariang, namar ba ki hap ban pynlong klas ha ki jaka sah ba shipor namar ka jingbym long shngaiñ jong ka ïing skul.
Ki video bad ki dur ba la sam da ka NGCO ki pyni ïa ar tylli ki jingtei kiba i kum ki jaka bret jaboh ban ïa ki ïing skul kiba ai jinghikai. Ka seng ka la kynnoh ba ym shym la pynlong klas ha katei ka skul la bun snem, khlem da shimkhia ïa ka jingeh jong ki khynnah skul bad ki nonghikai.
“Ki nongshong shnong ki la pynpaw ïa ka jingsngewsih kaba jur bad ki la kylli balei ki bor pynïaid ki dang ïai bteng ban leh matlah ne leh klet ïa kum kane ka mat kaba kongsan kaba ktah ïa ka jingpule bad ka jingshngaiñ jong ki khynnah. Ngi kum ki dkhot jong ka seng bhalang ngi kwah ban kyntu ïa ki bor ba dei peit ba kim dei ban iehnoh ïa kane ka mat bad ban jurip bad maramot noh ïa kane ka skul,” la ong u Tengrak.
“Ka jingpule ka dei ka nongrim jong ka lawei jong ngi, bad ka jingbym shimkhia ha kane ka kam ka long kaba ym lah ban pdiang”, la bynrap biang ka seng.
