Shillong, Naiwieng 03
Kan dei ka sien kaba nyngkong eh ba ka Nongkseh kan jop da ka said ha ka lympung ïalehkai First Division 2025 ba la pynïaid da ka Shillong Sports Association, hadien ba ka la lah ban pynliem noh ïa ka Nongthymmai da 1-0 kol ha ka lah sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la thep da u Mebankhraw Wahlang (83) na ka bynta ban pynlong ïa kane ka kynhun ban khur ïa ka jingjop kaba hynñiew bad ban long ka kynhun kaba khlem pat shah thep wat tang shi kol ruh ha kane ka lympung.
Haba phai sha kawei pat ka jingïakhun, ka Mawtawar ka la pynliem noh ïa ka Pohkseh da 2-1 kol. Ïa kine la thep da u Nikrak Sangma ha ka minit kaba 12 bad u Aldo Mac Nongneng (73), hynrei u Wanlambha Kharpran (29) u la lah ban pynphai kylla shi kol na ka bynta ka Pohkseh. Lyngba kane ka jingjop ka Mawtawar ka la wan hashwa ïa ka Nongthymmai, hynrei ka Nongthymmai ka dangsah sa ar sien ïakhun. Te kumta ka Mawtawar kan ym thikna ba kan dangïai bat ïa katei ka kyrdan.
Ka jingïalehkai ha ka sngi Ba-ar kan long hapdeng ka Meghalaya Police pyrshah ïa ka Ryntih ha ka por 1:15 janmiet.
