Shillong, Naiwieng 03
Ka Justice (Retd) BP Katakey Committee ka la ai jingmut ban pynpra noh ïa ki 33 tylli ki Coke Oven Plant kiba la pynïeng beaiñ hapoh ka East Jaiñtia Hills bad West Khasi Hills tang hapoh shi taïew.
“Ka jingbym pynpra ïa kum kine ki karkhana Coke Oven ba la pynïeng beaiñ ka pynkiew ïa ka jinglah ban pyndonkam ïa u marpoh khyndew, kum u dewïong uba la ïoh na ka jingtih beaiñ hapoh ka Jylla, bad kumta ka jingpynpra mardor ïa kum kine ki karkhana Coke Oven ka long kaba donkam,” la ong ka komiti ha ka ‘interim report’ ne ka kaiphod kaba shipor kaba 33 ba la dep ban aiti hakhmat ka ïingbishar Meghalaya High Court.
Ka la ïathuh ruh ba wat hapdeng ka jingïakren hynrei ym shym la pyntip ïa ka komiti halor ka jingpynpra ïa ki 33 tylli ki Coke Oven Plant ba la shna beaiñ (16 tylli ha East Jaiñtia Hills District bad 17 tylli ha West Khasi Hills district).
Ki jingai jingmut jong ka komiti ki long katkum ka hukum jong ka ïingbishar Supreme Court kaba 25 tarik u Naiwieng, 2024, kaba la bthah ban pynpra ïa ki karkhana ki bym ïahap bad ki kyndon buh jaka.
Ka Meghalaya State Pollution Control Board (MSPCB) ka la ïathuh ba 9 tylli ki Coke Oven Plant kiba don ha West Khasi Hills kim pat treikam, katba ki 17 tylli ki Plant ki bym ïahap bad ka ‘Siting Norms’ ruh kim pat treikam.
“Ngi ai jingmut ban pynlong ïa ka jingleit peit bniah da ka MSPCB manla ka lai bnai ban pynthikna ba yn nym don kano-kano ka Coke Oven Plant kaba la seng bad pyntreikam beaiñ,” la ong ka komiti.
La bthah ïa ka Sorkar Jylla ban aiti ïa ka kaiphod jong ka jingbud ryntih hapoh shi taïew. Ka MSPCB bad ka tnat Mining and Geology ki dei ban ai ïa ki kaiphod ba la leh manla ka lai bnai.
