Shillong, Naiwieng 03
Ka NITI Aayog ha ryngkat ka jingïatreilang bad ka Sorkar Jylla ha ka Lah Sngi U Blei ka la pynlong ïa ka ‘workshop’ kaba shisngi halor ka ‘Hill Regions Planning Initiative’ (HCRPI) ha Courtyard by Marriott, Shillong.
Kane ka ‘workshop’ ka la wanrah lang ïa ki heh ophisar Sorkar, ki nongthaw aiñ, bad ki ‘riew shemphang ban thaw ïa ka saiñdur na ka bynta ka, “Developing Sustainable, Climate-Resilient, and Economically Vibrant Hill Cities.”
Ha kane ka jingïalang la don lang ruh u Myntri ka tnad Arts & Culture, ka Sorkar Jylla, Bah Sanbor Shullai kum u Kongsan, bad uba la ai ruh ïa ka jingkren ba kongsan jong ka jingïalang.
U Bah Shullai u la pynpaw ba ki jaka sor ba long lum ki long kiba la kyrkhu da ka spah mariang bad ka jinglong tynrai jong ka kolshor, hynrei ki ïakynduh ïa ki jingeh kiba kham pher ha ka liang ka jinglong-jingman ka jaka, ki jingtei, bad ka jinglong-jingman suiñbneng.
U la khot ïa kane ka jingthmu kum ka sienjam ha kata ka liang na ka bynta ka “jingroi kaba neh bad kaba kynthup lang” hapoh ka jingïalam ba ïohi jngai jong u Myntri Rangbahduh ka ri, u Narendra Modi.
U la batai ïa kane ka ‘workshop’ kum ka lad ban prat lynti sha ka rukom pynroi ka bathymmai kaba pynïabiang lang ïa ka jingroi ka ïoh ka kot bad ka jingïada mariang, kaba kyntiew ïa ka jingseng kam seng jam ha ka thaiñ, ki kam jngoh kai ha ryngkat ka ïoh ka kot bad ka jingpynkup bor ïa ki samla.
U la pynskhem ba “Ka Meghalaya ka la ngeit la slem bah ba ka roi ka par bad ka mariang ki dei ban ïa ïaid ryngkat, bad katba ka ri ka dang jam sha ka ‘Viksit Bharat @ 2047’, ngi dei ban pyntikna ba ki jaka lum jong ngi kin ym sahdien.”
Haba ai ïa ka jingkren pdiang burom, u Commissioner & Secretary ka tnad pynroi sor, u Vijar Kumar D. u la ñiew ïa kane ka jingthmu, “kaba biang por bad kaba biang eh”.
U la batai bniah halor ka “jingïohi jngai kaba don jingthmu” jong u Myntri Rangbah na bynta ka Meghalaya ban long ka “Jylla kaba la kiew” bad “hapdeng ki 10 tylli ki Jylla kiba paw ha ka ri ha u snem 2032”.
Ha kajuh ka por, u la batai ïa ka thong ba 10 snem, ba la buh ha u snem 2022, kaba thmu ban thaw ïa ka ‘Viksit Meghalaya’ da kaba pynbha ïa ka GDP, ki SDG, bad ha kaba kut eh ban pynbha ïa ka jingsuk ha ka rukom im.
Nalor kane, u la ong, “Ka mat ba kongsan ka long ba ka Sorkar Jylla jong ngi ka la buh ïa ka sor kum kawei na ki 10 tylli kiei-kiei kiba ka Jylla ka kwah ban pynleit jingmut.”
U la kdew ba ki rukom pyrkhat jong ka Jylla ki la nang kiew haba ïadei bad ki mat kiba kyllaiñ katba ki nang pynkhlaiñ ïa ka jingsynshar ha ki jaka sor.
Ha kane ka sngi, la ïoh ruh ka jingkren na ka Principal Economic Adviser & Programme Director, NITI Aayog, ka Anna Roy, Planning Adviser ka North Eastern Council (NEC), u Som Kamei bad kiwei.
Kane ka long katkum ka kyrwoh na u Commissioner & Secretary ka tnad ki kam pynroi sor ka Sorkar Jylla.
