United States, Naiwieng:
U Treasury Secretary, U Scott Bessent, ha ka Sngi U Blei, u la ong ba ka sorkar u Trump, ka la pynkhreh ban pynkiew ia ka khajna na bynta ka China, lada ka China , ka dang iai bteng ban khanglad ia ka jingshalan ia ki marpoh khyndew kumba ju long baroh shi katta.
Ka China ka la pynbna ha ka Sngi Palei ba kan pynsangeh shi snem ia ki jingkhang kiba ka la buh ha u Risaw halor ki mar bad ki tiar kajuh shemphang mynta, hynrei u Bessent u la pynpaw ia ka jingsngewkhia ba ka China kam ju bud ryntih ne ïaid katkum ki jingkular jongka.
Kum kine ki mar poh khyndew la tih ha ki katto katne ki ri, kynthup ia ka ri America, hynrei ka China ka don ka jingsynshar kaba rit eh ha kaba pynkhreh ia kine ki nar na ka bynta ban pyndonkam ha ki karkhana.
La pynbna ia kane ka jingpynsangeh, hadien ka jingiakren dang shen hapdeng U Trump bad u paralok jong u, u Xi Jinping, u nongialam ka China.
Bad la ong ba katto- katne ki jingpyrkhing ban shalan mar shabar ri kiba la rai mynshwa da ka China ki dang sahkut hi kumjuh bad ym pat shym la pynkylla ne pynmih da kawei pat ka rai.
Hadien ka jingiateh bad ka “jinglong babha” hapdeng ki nongialam jong ki ar tylli ki ri kiba heh tam ha ka pyrthei, u Bessent u la ong ba u kyrmen “ngi lah ban shaniah ha ki ban long ki paralok kiba kham lah ban shaniah.”
Lada ym dei, “ngi lah ban leh eiei biang da ki khajna,” u Bessent u la maham, da kaba pynksan ba ka United States ka la pynkhreh ban pyndonkam ïa ka “jingiakut kaba heh tam.”
“Ngim kwah ban iathud ne iakhlad paralok bad ka China, hynrei ngin hap ban tehlakam bad pynduh- pyndam shi syndon ia ka jingma kaba la wanrah da ka China”, u la ong.
Kum shi bynta jong katei ka jingiateh ba la pynbna, ka US la ong ba kan pynduna da 10% ia ka jingbuh khajna jongka, pyrshah ia ki mar khaïi jong ka China kiba shalan na China sha America.
Kane ka jingiateh soskular ka pynbor ruh ia ka China ba kan shim ia ki lad ki lynti kiba kongsan ban khanglad ia ka jingtuid jong u droks fentanyl sha ka ri America, ha kaba ka jingdih ia u droks synthest opioid uba khlaiñ bor ka la wanrah ia shibun tylli ki jingiap ha ki por ba la leit.
Katkum ka kaiphod na ka tnat ba dei khmih jong ka US, ka China ka long ka ri kaba heh tam ban pynpoi ia u dawai fentanyl sha ri America.
