Shillong, Naiwieng 03
Ka liang pyrshah ka Voice of the people Party (VPP) ka shem ba ka don ka jingïapher jingmut bad la ka jong ka nongrim halor ka jingpynlong regular ïa ki nongtrei adhoc, kaba la pynmih ïa ka jingïakren bad ka jingkulmar jingmut.
U Bah Ardent Basaiawmoit, President ka VPP ha ka sngi Nyngkong, ka 03 tarik u Naiwieng 2025, u la phah da ka dorkhas sha u Myntri Rangbah ka Jylla u Conrad K Sangma ban dawa ba ym dei ban wengkam ïa ki nongtrei Adhoc kiba la thungkam hadien u snem 2007.
Ha ka dorkhas, u Bah Ardent u la pynpaw ba ka VPP ka pyrshah ïa ka Office Memorandum jong ka Sorkar ba pynmih ha ka 25/09/2025 ba ong ba dei ban weng kam noh ïa ki nongtrei Adhoc ba thungkam hadien u snem 2007 bad ba ki hap ban ïa khun ïa ka eksam thungkam.
U la ong ba ki nongtrei adhoc ba thungkam hadien ka 31 tarik u Nohprah (December) 2007, ki la ai ka jingshakri ba palat shiphew snem khlem ka jingsangeh kam bad ka jingshakri jong ki, ka la pynlah ïa ka Sorkar ban pynïaid ïa ki kam ki jam.
Namar kata, ka long kaba sngew pyrshah ba kine ki nongtrei kin shah wengkam bad ba kin ïa khun ïa ki eksamin thungkam. “Kam dei ka jingleh bakla jong ki ba ki la shah thungkam bad iai bteng ban ai ka jingshakri,” la ong u Bah Ardent.
Katkum ka dorkhas la ong ba ka VPP ka pyrshah jur ïa ka hukum jong ka Sorkar ban weng kam ïa kine ki nongtrei ba la thungkam khlem ki sanction post. “Ka long kaba bakla na ka liang ka Sorkar ban kyndit bynriew ha u snem 2025, haba ki nongtrei ki don ïa ka hok ban kam ïa ka jingthung kam pura kumba long ïa kiwei pat kiba hashwa jong ki.”
“Ngi dawa ba ïa ka jingshakri jong kine ki nongtrei dei ban pynskhem pura noh bad ka Sorkar ka dei ban sangeh syndon ban pyndik ïa ki,” u la ong.
Ha kajuh ka por, ka VPP ka la kyntu ïa ka Sorkar ban pynkut noh syndon ïa ka jingthung kam adhoc kaba long pyrshah ïa ki kyndon ka Sorkar hadien habud bad ban tynrong ïa ka jingkitkhlieh ha ki Ophisar ba leh tam. Hynrei, haba phai pat sha KHADC, ka VPP mar synthaw ïa ka Executive Committee, ka la weng kam bad pynhiar kyrdan biang ïa palat 30 ngut ki nongtrei adhoc kiba la shah thungkam pura ha ka Executive Committee kaba la leit noh, la bynrap u Bah Ardent.
Shuh shuh u la ong ba kine ki nongtrei ba shah ktah ha ka hukum jong ka Executive Committee ka VPP, ki la tied ïa ka jingkhang jong ka ïingkashari Meghalaya High Court, kaba la pynmih ïa ka hukum ba shipor, ba dei ban pynsangeh shuwa ïa ki hukum jong ka Council pyrshah ïa kine ki nongtrei.
Kane ka mukotduma halor kane ka hukum ka EC ka VPP, ka dang don hapdeng ka jingbishar ka ïingkashari haduh mynta, la ong u Bah Ardent.
Kum ka dorkhas ba ka VPP ka la phah sha u Myntri Rangbah, ka la pynpaw ba ka VPP ka ïeng skhem halor ka nongrim jong ka aiñ, ka jingtreikam kaba shai, ka jingbahkhlieh, jinglah treikam bha ki bor treikam bad ka hok ki nongtrei.
