Shillong, Naiwieng 03
U Secretary jong ka Board of Control for Cricket in India (BCCI) u Devajit Saikia u la pynbna da ka khusnam pisa kaba T. 51 klur na ka bynta ka kynhun ïalehkai ka ri India hadien ba ka la rah ïa ka nam lahduh ha ka ICC Women’s World Cup.
Kane ka kynhun ïalehkai ka ri kaba la mad ïa ka jingshah rem ha ka final jong ka World Cup 2005 bad 2017, ka la lah ban pynliem ïa ka South Africa da 52 run na ka bynta ban khur ïa ka nam lahduh ba nyngkong eh ha ka pyrthei ha ka jingïalehkai ODI bad T20I.
U Saikia haba pynpaw ha ki lad lad pathai khubor u la ong, “Ha u snem 1983, u Kapil Dev u la wanrah ïa ka juk kaba thymmai bad ka jingai mynsiem ha ka kriket da kaba pynlong ïa ka India ban jop ïa ka World Cup. Ka juh ka jingkmen bad ka jingai mynsiem la wanrah da ki kynthei mynta u snem. Ka Harmanpreet Kaur ryngkat ka kynhun jong ka, kam shym la rah tang ïa ka trophy mynta ka sngi, hynrei ka la jop ïa ka dohnud jong baroh ki nong India. Ki la plie lad ïa ka pateng ban wan jong ki nongïalehkai kriket kynthei. Ka kriket kynthei ka la dep poi sha ka kyrdan kaba shalor haba ka kynhun jong ngi ka la jop ïa ka Australia ha ka semifinal.”
Naduh ba u Jay Shah u la shimti kum u secretary ka BCCI naduh u snem 2019 haduh u snem 2024, u la wanrah ïa shibun ki jingkylla ha ka kriket jong ki kynthei. La pynleit jingmut ruh ban wanrah ka jingïaryngkat ha ka jingsiew. Ha u bnai ba la lah, u Chairman ka ICC u Jay Shah u la pynkiew ia ka khusnam jong ki kynthei da 300%. Kham mynshwa, ka khusnam ka long $2.88 million, bad mynta la pynkiew sha ka $14 million. Kine ki sien jam baroh ki la kyntiew shibun ïa ka kriket jong ki kynthei. Ka BCCI ka la pynbna ruh ïa ka khusnam kaba T.51 klur na ka bynta ka kynhun baroh kawei kaba kynthup lang naduh ki nongïalehkai, ki coach, bad ki nongïarap,” u la bynrap.
Haba kheiñ na ka jingïoh khusnam halor katei ka jingjop kaba USD 4.48 million (T. 39.78 klur) na ka International Cricket Council (ICC) bad kumjuh na ka BCCI, ka India kan kamai haduh T. 90 klur kaba long ka khusnam kaba heh duh.
Haba phai sha kane ka jingïakhun, ka South Africa ka la jop ïa ka jingkynting pisa bad ka la jied ban kawang bol nyngkong. Ka jingïatreilang hapdeng ka Smriti Mandhana (45 na ki 58 bol) bad ka Shafali Verma ka la nangpynïoh mynsiem ïa ka India, bud sa ka jingkamai kaba 62 ron hapdeng ka Shafali (87 na ki 78 bol) bad ka Jemimah Rodrigues (24 na ki 37 bol). Ka India ka la lah ban kynjoh sha ki 166/2.
Ka jingkamai 52 ron hapdeng ka kapten ka Harmanpreet Kaur (20 na ki 29 bol) bad ka Deepti Sharma ka la pynlong ïa ka India ban tam ïa ka 200 ron. Ka jingïakhun kaba khatduh jong ka Deepti (58 na ki 58 bol) bad ka Richa Ghosh (34 na ki 24 bol) ka la ïarap ïa ka India ban kamai sha ka 298/7 ha ki 50 over.
Haba wan beh ïa ka thong, ka South Africa ha kaba sdang ka la pyrshang ban ïalehkai bha ha kaba ka Tazmin Brits (23 ha ki 35 bol) ka la long kaba la shah pynhap wiket. Wat hapdeng ka jingïalehkai bha ka kapten ka Laura Wolvaardt, hynrei ka Shafali Verma (2/36) bad ka Shree Charani ki la lah ban pynduna ïa ka SA sha ka 148/5.
Ka Wolvaardt u la kamai 61 ron na ka bynta ka wiket kaba hynriew ryngkat bad ka Annerie Dercksen (37 ha ki 35 bol), kaba suki suki ka la sdang ban pynïoh mynsiem ïa ka India. Ka Wolvaardt (101 run na ki 98 bol) ka la bteng ïa ka rukom ïalehkai kaba itynnad bha, kaba la wanrah ïa ka jingkamai ïa ka spah run da 169 ruh pyrshah ïa ka England ha ka semi final. Hynrei ka jingkylla ïa ka jingïalehkai na ka Deepti ka la buh jingeh ïa katei ka kynhun na ka bynta ban kynjoh sha ki 221/8 bad ha kaba kut ka South Africa ka la shah pynhap wiket baroh bad ban kamai 246 run.
