Jerusalem, Naiwieng:
Ka Israel ka la pyntip ba ha ka Sngi U Blei, ka la ioh pdiang biang sa 3 tylli ki metiap jong ki nong Israel kiba sahkut ha Gaza naduh ki por jong ka thma hapdeng ka Hamas bad ka Israel, ia kiba ka US ka la pyniakren ban ia pyllait bad kylliang briew hapdeng ka Hamas bad ka Israel bad ka Israel ruh ka la pynphai noh ia ki metiap jong ki nong Palestine kiba khlad ha ka kti jong ka Israel bad kumjuh ruh ka la pynphai noh ia kito kiba dang im, kiba shah kem bad shah bat ha Israel naduh ki por ba la leit.
Wat hapdeng ki jingiakynad kiba dang jia haduh kine ki sngi hapdeng ka Hamas bad Israel, ka jingïasuk ban ia pyn jai-jai noh ka la treikam mynta ha Gaza naduh ka 10 tarik u Risaw katkum ka jingïateh kaba pynleit jingmut ban ia pynphai biang noh ïa baroh ki nongshah rahbor jong ki nong Israel, kiba dang im bad kiba la ïap.
“Ka Israel ka la ioh pdiang, lyngba ka Red Cross, ia ki synduk metiap jong ki lai ngut ki nongshah rahbor kiba la khlad noh ha Gaza, ia kiba la aiti sha ki shipai IDF bad Shin Bet hapoh Gaza Strip,” la ong ka ophis jong u Myntri Rangbahduh ka Israel.
U nongaiktien jong ka tnat ka koit- ka khiah jong ka Israel u la ong hadien ba ka met jongki ka la poi ha ka jaka wad bniah jong ka ri naka bynta ban ithuh bad tohkit ia ki jingjia bad ka daw jong ka jingiap jongki.
Nangta ki riew shemphang kin sa iakynduh ia kiba ha iing- ha sem jong kiba iap baroh ban iakren bad batai bniah ia ki kaiphod ba la ioh ban buh jingkheiñ.
Ka Hamas, ka la bat ia 48 ngut ki nongshah rahbor ha Gaza, ba kynthup ia 20 ngut, kiba la pynthikna ba ki dang im, ha ka por ba la pynbna ia ka jingsangeh iasiat.
Naduh ba sdang ka jingiateh kular, ka Hamas ka la pyllait ia ki nongshah rahbor kiba dang im bad sdang ban aiti ia ki met iap jong ki 28 ngut ki nongshah rahbor kiba la iap ha kti jongka naduh ba sdang jong ka thma, tad haduh kane ka kynti ba la pyntreikam ia ka jingsangeh iasiat bad ka jingiakylliang briew.
Na kine kiba hadien, haduh mynta ka la pynphai biang 17 ngut, kiba kynthup ia 15 ngut ki nong Israel, uwei u nong Thailand bad uwei pat u nong Nepal.
