Ka jingïakhun bad jingpyrshang ban wanrah ïa ka jingshngaiñ ha ka leit ka wan ha ki lynti ki surok ka long shisha kaba donkam bad kongsan bha. Dang shen ngi la ïoh ban sakhi ba ki pulit ka Ri-Bhoi ki la shim ïa kum kane ka sienjam ban khanglad ïa ka jingñiah khlem akor jong ki kali khamtam lei ha ryngkat ka jingshoh khawiang. Kane ka jingshimkhia ki pulit ka Ri-Bhoi ka dei hadien jong ka jingjur jong ki jingjia ïatyngkhuh kali bad ka jingduh noh jong kiba bun ki mynsiem briew tang namar ka jingñiah khlem akor bad pynher sted jong ki nongñiah ïa ki kali. Kane ka jingleh jong ki pulit ka Ri-Bhoi, la ïohi ba ka la ïoh ïa ka jingïaroh na baroh ki liang, ha kaba ym tang ba ki la lah ban pynduna ïa ki jingjia kiba sngewsih hynrei wat ban daiñ kuna ïa kiba bun ki kali kiba ïaid bad pynkheiñ ïa ki aiñ ñiah kali, kaba kynthup naduh ki arshaka haduh ki saw shaka bad khamtam lei ki trok kiba la pynsyrtok shi katdei eh ïa ka leit ka wan ha ki surokbah.
Hooid ha ki por bad ki snem kiba la leit, ka jingdon jong ki kali ha ki surok syngkien ruh ka dang long kaba duna bad ki jingjia ruh ki dang kham duna, hynrei kat nangïaid ki por la ïohi ba ki surok ruh ki la khapngiah tang da ki kali la ka dei ha ki surokbah ne ki surok ha sor Shillong ruh kumjuh. Ka jingdon ïa ki kali ha ki phew snem kiba la leit mynshwa, ka ju dei ne long beit ba tang kiba don ba em kiba lah ban thied ne pyndonkam kali hynrei kat nangïaid ki por, ki kali ki la kylla long ki jingdonkam kiba manla ka sngi jong baroh ban pyndep ïa la ki kam ki jam, kaba dei ruh ka jingdonkam kaba ïaid katkum ki por. Kum ha kine ki por kiba mynta lei, kam long shuh kaba eh ban ïoh thied kali, namar ka jingwan shakhmat jong ki bank ban ai ram thied kali, ka la pynsuk ïa kiba bun bad wat ïa kito kiba duna ha ka ïoh ka kot ruh kumjuh.
Kumba ka paw mynta, ngi ïohi ba ha ki thaiñ Ri-Bhoi kata naduh ba la pynjur jingkhynra bad talasi da ki pulit, ki kam pynher kali bad ñiah khlem akor ki la sdang ban duna bad kynjah bha. Hynrei kaei kaba paw bad kaba buh jingma pat ka dei ha ki surok ha nongbah Shillong khamtam lei ha ka por mynmiet, kaba la ishyrkhei shisha ym tang ïa ka rukom ñiah kali hynrei wat ka jingïaïeng kai hapdeng jong ki surok, kaba la pynwit shi katdei eh ïa ki nongleit nongwan.
Ka surok ha Khyndailad kaba hiar sha Polo lyngba ka pynnoh nadien jong ka Hotel Dhaba haduh ban da lait ïa ka Polo, ka la pynwit shi katdei eh na ka rukom pynïeng kali jong ki briew khamtam ha ka por mynmiet. Haba ïaid na Khyndailad lyngba ka surok nakhmat Hotel Pegasus bad hiar sha Polo khamtam ha ka por mynmiet, la ïohi ba ka la long shisha ka ktem kaba shyrkhei jong ka jingbun ki briew kiba pynkhapngiah bad teng-teng lei wat tang ban ïaid kali ruh ka shitom shibun. Ha kine ki bynta ym long ban ïakren ne pynwit ïa ki nongïeng kai ne ki kali kiba pynïeng bad diang bad mon hynrei hap ban ap beit haduh ba kin da pyllait. Ka jingma ka dei ruh lyngba ka surok ba hiar sha Polo nadien jong ka Hotel Dhaba, namar nalor ba ka dei ka ‘One Way’ ne ka surok ba ïaid kali tang shiliang hynrei ha ka por mynmiet kam long kumta, ki arshaka ne ki kali ki kiew beit ne Polo sha Khyndailad lyngba kane ka surok bad ym tang ba ki kiew jai-jai hynrei don lei kiba pynher wut-wut, kaba buh jingma shi katdei eh ïa kiba hiar.
Halor kine kiei-kiei, la ïohi ba ka jingshlur jong ki briew ban pynïeng katba mon, ka dei namar ka jingbym don jong ki pulit pahara ki ban peit ban khmih ne bthah ba ym dei ban pynwit ïa ki nongleit nongwan. La ka long ha ka thaiñ Khyndailad ne Polo, ka jingïarung ïamih bad pynïeng jong ki kali ka long kaba ym ithuh ithaw bad kaba buh jingma ïa kiba ïaid lynti lyngba kine ki surok. Kumta ka long kaba donkam ïa ki pulit ka nongbah Shillong ba kin shimkhia lem halor kane, ban pynbeit ïa kine kiei-kiei baroh bad ban nym ap haduh ban da don ki jingjia hynrei ban pyrkhing lypa shwa ban jia eiei.
