Shillong, Naiwieng 03
U Monas Bongrung bad ka Filinza Hansepi ki la long ki nongmareh kiba stet tam na ka bynta ban khur jingjop ha ka jingïakop mareh ba la tip kum ka Run For Unity kaba la long ha ka sngi Thohdieng ha Ri-Bhoi District.
Ïa kane ka jingïakop mareh kaba 5 kilometre la pynlong da ka shlem treikam u Superintendent of Police ha ryngkat ka ophis u Deputy Commissioner bad District Sports Officer. Kane ka jingïakop mareh ka long shi bynta ban rakhe ïa ka lyngkhuh sngi kha u Sardar Vallabhbhai Patel, uba long u Myntri ka tnat ki kam pohïing uba nyngkong eh jong ka ri.
Ka lynti jong kane ka jingïakop mareh ka la sdang na Saiden Indoor Hall sha NSCA Indoor Hall kaba ha Umlyngkdait.
U Monas u la khur ïa ka jingjop ha ka liang ki shynrang ha kaba u la lah ban pyndep hapoh 20 minit, ha kaba la bud sa u Skhemlang Suba bad u Piku Nath kiba la wan ba-ar bad balai.
Katba ka Filinza ka la jop ha ka liang ki kynthei ha ki 25 minit, 16.71 sekhon, ha kaba ka la tam tang hapoh 18 sekhon ïa kaba wan ba-ar ka Jenny Ramde bad ka Dakahi Kyndait ka la wan ha ka kyrdan balai.
Ki nongmareh kiba la tymmen tam ha kane ka jingïakop ki long u Pel Bey bad Kong Snora Rani. Kitei baroh ki nongjop ki ïohpdiang da ki trophy lem bad ki song pisa.
