Nongpoh, Naiwieng 03
Kawei ka pla rong ïong, kaba la ieh halor u mawkynroh ba phiah (divider) ïa ka surok NH-6 ha Nongpoh hajan ka Meghalaya Apex Bank, kala pynher syrngiew ïa ki paidbah ka thaiñ namar ka jingsuba ba lehse ka dei ka pla ba buh bom.
Ïa kane ka pla la lap naduh ka por 5 baje janmiet bad mar-mar ki pulit kila leit ban ker kut sawdong ïa kane ka jaka ban pynthikna ba ki paidbah kin ym tur shajan kane ka pla.
Ki paidbah ka thaiñ ki la dap da ka jingsyier bad ka jingrit mynsiem haba ïohi ïa kane ka pla kaba la buh halor kane ka kynroh surok-kaba pynartatien ïa ki ïoh lehse u dei u bom, khamtam hadien ka jinglap ïa u bom IED bala thep ha kawei ka pla kaba la ieh hakhmat ka ïing u MLA barim, Bah Nehlang Lyngdoh, kaba don ha Umsning.
Ka kynhun Bomb Squad kala hiar mar-mar sha Nongpoh bad ha ka jingtohkit la lap pynban ba katei ka pla ka dei kaba dap tang da ki jaiñ suda, bad imat ba la kum klet da mano re mano ha katei ka jaka.
