Patna, Naiwieng:
Haba dang sah sa tang katto katne sngi ban sdang ka bynta ba nyngkong jong ka ilekshon sha ka ïingdorbar thawaiñ jong ka Bihar, u kyrtong Myntri Rangbah jong ka Mahagathbandhan bad u nongïalam ka RJD u Tejashwi Yadav ha ka sngi U Blei u la pynpaw ïa ka jingshaniah da kaba pynbna ïa ka tarik ban bam smai.
Haba pynskhem ba ka kynhun pyrshah kan sa thaw thikna ïa ka sorkar ban wan, u Tejashwi u la ong, “Ha ka 14 tarik u Naiwieng, yn pynbna ïa ki nongjop ha ka jingthep vote sha ka ïing dorbar thawaiñ jong ka Bihar, bad ha ka 18 tarik u Naiwieng, yn sa pynlong ïa ka jingpynsmai.”
Kane ka jingkren ka la mih hadien ka jingshah kem jong u MLA barim ka Mokama bad u kyrtong ka JDU u Anant Singh, ha kaba ïadei bad ka jingshah pynïap u Dular Chand Yadav uba dei u nongkyrshan jong ka seng Jan Suraaj jong u Prashant Kishor.
Da kaba kynnoh ba katei ka jingjia ka dei ban jia “ba la dei ban jia”, u Tejashwi u la ban jur ba baroh ki nongleh kam sniew, khlem da kheiñ ïa ka jaitbynriew bad ka niam, kin don ha lyndet jong ki kynroh hapoh ki taïew hadien ba ka kynhun INDIA ka la wan ha ka bor synshar.
“Hapdeng ka 26 tarik u Naiwieng haduh ka 26 tarik, Kyllalyngkot, kaba kynthup ïa ka por kharmaas kaba shibnai, u Tejashwi un pynthikna ba baroh ki nongleh kam sniew, khlem da kheiñ ïa ka jaitbynriew bad ka niam jong ki, kin don ha phatok bad kin mad ïa ki jingpynshitom kiba tyngeh tam,” u la ong.
Ha ka jingthoh kaba la buh ha ka rynsan X, u Tejashwi u la ong ba ka Bihar ka long kaba hakhliehduh jong ki jylla kiba jur bha ki kam runar katkum ka kaiphod jong ka National Crime Record Bureau.
U nongïalam ka RJD u la kyntu ruh ïa u Myntri Rangbahduh ka ri u Narendra Modi uba wan jngoh ïa ka Bihar ha kane ka sngi U Blei na ka bynta ban ïalap ilekshon ban shimkhia ïa ka jinglong jingman ha kane ka jylla.
