Shillong, Naiwieng 04
Kum shi bynta ban dang ai mynsiem bad pynshlur ïa ki samla pule, ka Synod College, Shillong ka la pynlong ïa ka ‘Convocation Day’ na ka bynta ki 68 ngut ki samla ba la pyndep ïa ka kyrdan Master ha ka sobjek ‘Education’ bad ‘Political Science’.
U Bah Mayralborn Syiem, MLA ka Nongpoh Constituency u la long kum u kongsan, ha ka jingïadon lang ka Dr. G. Lyngdoh, Principal, Synod College, Shillong, Dr. E.B. Majaw, Associate Professor & HOD, Dept. of Education (P.G), Dr. Jop Hek, Assistant Professor & HOD, Department of Political Science, (PG) ka Prof. S.M Sungoh ki nonghikai bad kiba shah khot sngewbha.
La pynkup burom ïa ki arngut ki samla pule ba la ïoh ha ka kyrdan 4th bad ba 5th ha ka jingpynbna risol ba dang shen ka North-Eastern Hill University ha ka M.A. Education, ba kynthup ïa ka samla Kelida Sumer bad ka samla Ibankyntiew Nongbet, kumjuh ka samla Pynishisha Wanniang kaba ïoh heh mark duh ha ka M.A Political Science.
Haba ai jingkren u bah Mayralborn Syiem u la ai ka jingïaroh ïa kane ka shlem ai jinghikai kaba la long kawei na ki shlem ai jinghikai ba la paw bad ka biang ha ka Jylla, kaba la lah ruh ban sei shibun ki riewstad bad ki riew shemphang kiba la long ki nongïalam ka Jylla ha ki bynta bapher-bapher.
Shuh-shuh u la pynpaw ruh ïa ka jingkmen halor ka jinglah jong katei ka shlem ai jingstad ban kyntiew ïa ka pule puthi hapoh ka Jylla bad ban ai ka jingshakri kaba bit ba biang ha ka Jylla.
U la kyntu ïa ki samla pule ba kin lehbha ha ka jingim bad khamtam ban lehbha ha ka jingpule ba kin dang bteng ruh ban pyndep haduh ka kyrdan PhD kumjuh ruh ba kin ïengskhem ha ka nongrim ba bha bad ba kin long kiba lah ban ïalam bad ban kyntiew ïa ka imlang ka sahlang.
