Shillong, Naiwieng 04
Ki nongïalam seng saiñ-hima na ki Jylla bapher-bapher ka thaiñ Shatei Lam-Mihngi (North East India) ha ka 4 tarik u Naiwieng, 2025, ki la wan ha kawei ka jingmut ban thaw ka rynsan ïatreilang kum ka sienjam ban don ka jingïatylli bad ka sur kaba kham jam ha ka saiñ-hima ka Ri India.
Kane ka rynsan kaba la tip kum ka One North East kan dei ruh ka rynsan ïakren ïa ki mat jingeh ba ki riewlum ka thaiñ ki ïakynduh na ka por sha ka por sha kiwei ki Jylla ka India.
La thaw ïa kane ka One North East da ka jingïasoi lang hapdeng u Conrad K Sangma, National President ka National People’s Party (NPP) bad Myntri Rangbah ka Jylla Meghalaya, u Pradyot Bikram Manikya, nongseng ka TIPRA Motha, u Mmhonlumo Kikon, National Spokesperson barim ka BJP bad Myntri barim ka Sorkar Nagaland, u Daniel Langthasa, u nongseng ka People’s Party Assam lem kiwei-kiwei pat bad ïa kaba la pynbna paidbah ha ka jingïalang kaba la pynlong ha New Delhi ha ka sngi Ba-ar.
Da kaba shim ba ka bor ka shong ha ka jingïatylli, ki nongïalam ka One North East ki ong ba ki riewlum ka thaiñ Shatei Lam-Mihngi ka Ri India ki la dei ban jam shakhmat palat ban ïa ka saiñ-hima kaba ïa pra.
Ki la ong ba ki mat ïakren ki dei kijuh na ka bynta ki nongshong shnong ka thaiñ hynrei bunsien pat na ki rynsan kiba ïapher bad kumta ka la dei ka por ban ai ha ki nongshong shnong kawei ka sur.
“La slem bha, ngi, ki nongïalam kane ka juk mynta jong ka thaiñ Shatei Lam-Mihngi, ngi la kren ïa kijuh ki mat bad jingsngewkhia jong ki briew jong ngi na ki rynsan bapher-bapher. Ngi la shem ba ka bor jong ngi ka shong eh ha ka jingïatylli, bad ka por kala dei ban ai sha ki briew jong ngi ïa kawei ka sur jong baroh lang,” ong ki nongïalam ha ka kyrwoh.
Kila bynrap ba kane ka kynhun thymmai kan shim ïa ka jingai mynsiem na ki jingïohi jngai bad ka nam jong ki Nongïalam ka thaiñ kiba la leit noh, kiba la ïakhun na ka bynta ka jingithuh kyrpang bad ka roi ka par jong ka thaiñ Shatei Lam-Mihngi.
Kum ka sienjam ba hap leh kyrkieh, yn sa thaw ïa ka Committee ka ban shong pyrkhat bad ïakren halor ki kam kiba dei ban leh, kynthup ki rukom treikam bad ka rukom long jong kane ka seng saiñ pyrthei ba tyrwa ban thaw.
“Ngi la rai ban ïatreilang ha ka ban pynkha ïa ka seng saiñ pyrthei ba kyrpang na ka bynta ka thaiñ Shatei Lam-Mihngi. Ngi la thaw ïa ka Committee bad kan sa aiti ïa ka kaiphod hapoh kine ki 45 sngi ban wan. Ngi wan hangne ym ban ïakhun pyrshah ïa kiwei ki seng sain pyrthei- ka jingpynleit jingmut ba hakhmat eh jong ngi ka long ïa ki briew ka thaiñ Shatei Lam-Mihngi. Ka jingthmu ka long ban ai ïa kawei ka rynsan na ka bynta jong ki,” ong u Conrad Sangma haba kren sha ki lad pathai khubor.
Ka jingthaw ïa ka “One North East” la shim kum ka sienjam kaba kongsan ban sei ïa ki nongïalam na ka thaiñ bad ban wanrah ïa ka sur kaba khlaiñ ha ka saiñ hima sima na ka bynta ki phra tylli ki Jylla ka thaiñ Shatei Lam-Mihngi ha ki rynsan jong ka Ri.
