Shillong, Naiwieng 04
Ka Hynñiewtrep National Youth Front (HNYF) Southern Border Area ka la dawa ban buh ïa ka jingkieng thew ne ‘Weight Bridge’ ban peitngor ïa ki trok kiba kit palat pud kiba ïaid lyngba ka jingkieng Umpung.
Ha ka shithi ba la aiti sha ka Deputy Commissioner ka East Khasi Hills District ha ka Sngi Ba-ar, u President ka seng, u Bah K. Thongni u la maham ba kan sa mih ka jingeh kaba khraw lada ym shimkhia ïa ki trok kiba kit palat pud.
Katkum ka jingong jong u, ka jinglah ban kit khia lyngba katei ka jingkieng ka long 9 ton, hynrei ki trok kiba kit palat pud ïa kane ki wanrah ka jingjulor ïa ka jingkieng.
Na ka liang u Executive Engineer, Mawsynram Division PWD (Roads), u la buh ïa ka ‘Signboard’ kaba kdew ïa ka jinglah ban kit khia lyngba katei ka jingkieng, hynrei ki trok kiba kit palat pud ki dang ïai bteng ban ïaid lyngba katei ka jingkieng, ha kawei ka liang kaba khate pat ïa ka jingim jong ka (jingkieng).
Katei ka jingkieng kaba la don la 60 snem eiei, kaba la shna ha ka por jong ka Sorkar Assam, mynta ka la pyni ki dak ki shin jong ka jingtlor, ong u Bah Thongni ha ka shithi haba bynrap ba ka jingjulor jong ka jingkieng Umpung ka ktah ym tang ïa ka East Khasi Hills hynrei wat ïa ka South West Khasi Hills, kumjuh ïa ka lad kamai jong ki nongshong shnong ha khappud.
Ka surok Ranikor-Umpung-Balat-Mawsynram kaba khim bad kaba khlem ka jingpynbha bha ka dei kaba ju jia bha ki jingjia aksiden, khamtam haba ïadei bad ki kali rit.
