Jowai, Naiwieng 04
Ka Khimusniang ka la khur jingjop ha ka Super Division Football Tournament (17th Kiang Nangbah Memorial Trophy), katba ka 7 Wasa United ka la jop ha ka 1st Women League Football Tournament 2025 ba la pynïaid da ka West Jaiñtia District Sports Association (WJDSA) ha ka sngi Ba-ar ha Kiang Nangbah Stadium, Jowai.
Ha ka jingïalehkai jong ka Super Division, ka Khimusniang ka la pynliem noh ïa ka Chutwakhu da 3-1. U Alwin Dkhar u la thep ar kol na ka bynta ka Khimusniang ha ka minit kaba 24 & 48 bad kawei pat da u Wanbing Passah (85), katba ïa ka shi kol jong ka Chutwakhu la thep da u Luckyness Khyriem (39).
Haba phai sha ka Women League, ka Nidaroiki Biam bad Aetishia Lytan ki la khyrwit da ki hat-trick ban pynlong ïa ka 7 Wasa United ban pynliem noh ïa ka Q.C.S Football Women Club da 8-0 kol.
Ha kane ka jingïakhun ka Nidaroiki Biam ka la thep saw kol ha ka minit 8, 22, 30 & 51, katba ka Aetishia Lytan (36, 56 & 60). Hashwa ïa kane ka Amethis Darnei ka la thep shi kol ha ka minit kaba 5.
