Maldives, Naiwieng:
Ka Maldives ha ka Sngi Saitjaiñ jong kane ka taïew ba la dep, ha ka sien ‘nyngkong eh, ka la khang ia kito kiba la kha hadien jong u snem 2007 ba ki dei ban sangeh noh ia ka jingdih duma, da kaba long ruh ka ri ba tang ma ka hi kaba buh da ka jingpyrkhing ia ki nongshong shnong jong kane ka juk ba mynta.
Kane ka sienjam, kaba la sdang da u President Mohamed Muizzu ha kaba sdang jong une u snem — kaba la treikam ha ka 1 tarik u Naiwieng , kan ïada ïa ka koit ka khiah jong ki paidbah bad kan kyntiew ïa ka pateng kaba lait na u duma, ong ka tnat.
“Hapoh ka kyndon thymmai, la khang pyrshah ia ki briew shimet kiba kha ha lane hadien ka 1 tarik u Kyllalyngkot, 2007 ban thied, pyndonkam, ne die ia ki mar duma hapoh jong ka Maldives,” ka la bynrap.
“Ka jingkhang ka treikam ia baroh ki jait duma, bad ki nongdie marbam ki dei ban pynshisha ia ka rta shwa ban die.”
Kane ka jingthew ka treikam ruh ïa ki nongwan jngohkai sha ka jaitbynriew jong ki 1,191 tylli ki lum rit kiba la saphriang kumba 800 kilomitar (500 mail) ha kylleng ka Equator bad kiba la tip bha na ka bynta ka kam jngohkai pyrthei kaba itynnad.
Ka tnad ka la ong ba ka pynneh ruh ia ka jingkhang kaba pura halor ka jingwanrah, jingdie, jingsam, jingdon, bad jingpyndonkam ia ki sikret electronic bad ki mar vaping, kaba treikam ia baroh ki briew shimet khlem da khein ia ka rta.
Ka jingdie duma sha u briew uba dang rit ka rta ka kit ia ka kuna kaba 50,000 rufiyaa ($3,200), katba ka jingpyndonkam ia ki tiar vape ka kit ia ka kuna kaba 5,000 rufiya ($320).
Ka jingkhang pateng kaba kum kane kaba la tyrwa ha Britain ka dang ïaid lyngba ka jingthaw aiñ, katba ka New Zealand, ka ri kaba nyngkong eh ban thaw ïa kum kane ka aiñ pyrshah ïa ka jingdih duma, ka la weng noh ïa ka ha u Naiwieng 2023, ym pat dap shisnem hadien ba la pyntreikam ïa ka.
