Hyderabad, Naiwieng:
Ki khyrdop jong ki kolej shimet ha kylleng ka Telangana ki la khanglut ha ka lah sngi U Blei kum ka jingpyrshah ïa ka jingbym lah jong ka sorkar jylla ban pyllait ïa ki jingsiew ne bai lutksan kiba dang sahteng.
Ki don kumba 2,000 tylli ki kolej kiba paw, kiba kynthup ïa ki Engineering, Pharmacy, MBA, MCA, B.Ed bad ki Nursing, kiba la khang khlem buh por.
Ki dkhot jong ka Federation of Associations of Telangana Higher Institutions (FATHI) ki la ong ba kim lah ban pynïaid ïa ki jaka pule jong ki namar ka jingbym siew ïa ka pisa basah bad kin dang bteng ïa ka jingkhang tad haduh ba ka sorkar kan pynkhuid ïa ka pisa kaba dang sahteng.
Ka sorkar jylla ka la kular ban pyllait T.1200 klur ka jingsiew shwa ka Diwali hynrei tang T. 300 klur ka la pynlait haduh mynta.
Ha ka janmiet jong ka lah sngi U Blei, ka sorkar ka la sdang ïa ka jingïakren lyngba u Additional Director General (Intelligence) Vijay Kumar, ha kaba u la tyrwa ban pyllait sa T. 300 klur.
Hynrei ki bor pynïaid jong katei ka kolej ki la kyntait, da kaba dawa ba dei ban pyllait noh mardor ïa 50 percent na ka pisa kaba dang sahteng kaba T.900 klur, kumba T. 500 klur ka ban pyllait noh shwa.
Kum shi bynta jong ka jingïakhih, ka FATHI ka la thmu ban pynlong bun tylli ki prokram ïakhih, kynthup ka jingïalang bad ki MLA bad ki MP kaba la long hynnin ka sngi ban ai ïa ki jingai jingmut, ka jingïalang paidbah bad shi lak ngut ki nonghikai na ki kolej shimet ha ka 8 tarik u Naiwieng bad ka jingïalang paidbah “Chalo Hyderabad” sha Secretariat ha ka 10 ne 11 tarik u Naiwieng.
La ïohi ba bun ki samla pule ki la leit phai sha la ïing, naba ki khlem da tip lypa ïa ka jingkhang dam jong ki jaka pule.
