Shillong, Naiwieng 04
Ka Seng Khasi Kmie kan pynïeng haduh 40 lane 41 tylli ki mawbynna ha Lumsohpetbneng ha ka 9 tarik mynta u bnai Naiwieng 2025 naduh ka por 8:00 baje mynstep.
Haba ïakren bad ki nongthoh khubor ha hall jong ka Seng Khasi College Shillong ha ka jingïadonlang u Bah Paia B Synrem, Assistant General Secretary ka Seng Khasi Kmie, Bah Dipshon L Nongbri, Vice President Seng Khasi Kmie bad Bah Hammarsing L Kharmar, Cultural Secretary ki la ïathuh ba kane ka jingpynïeng mawbynna ka long ka jingpynsah jingkynmaw ïa ka jingrakhe 125 snem ka seng Khasi kaba la seng da ki 16 ngut ki samla ka ban sa pynkut ha ka 23 tarik mynta u bnai kaba dei ka Seng Kut Snem.
Ki la ïathuh ba kine ki mawbynna la wanrah na kylleng ki tnat Seng Khasi bad Seiñ Raij.
U Bah Dipshon L Nongbri u la ong ba katkum ka jingngeit tynrai ba ka don ka jingïadei kaba jan bad ki maw namar ki don ki maw ba la jer kyrteng ki mawtneng, mawkneng, mawphor, mawbri, mawpun, mawpud, mawniam, mawshyieng.
U Bah Paia Synrem u la ïathuh ba ha ka por 3:00 baje janmiet un wan u Lat ka Jylla kum u Kongsan bad kan don lang ka prokram.
U la pyntip ba ka Seng Khasi Kmie ka la dep pynïeng ïa u mawbynna sahnam ha ka 20 tarik Nailur 2025.
U la ïathuh ba shwa ban long ka Seng Kut Snem, ka Seng Khasi Kmie ka ju pynlong ka jingïakynduh jong baroh ki tnat Seng kaba la pynbeit ban long ha ka 16 tarik mynta u bnai Naiwieng naduh ka por 10:00 baje mynstep ha Seng Khasi Higher Secondary School.
