Imphal, Naiwieng:
Ki la don saw ngut ki dkhot jong ka kynhun lehnoh United Kuki National Army (UKNA) kiba la shah pynïap ha ka jingïasiat bad ki bor pahara ha Manipur ha ka step jong ka sngi Ba-ar.
Kane ka jingjia ka la jia ha ka shnong Khanpi kaba hap hapoh ka Henglep Subdivision jong ka Churachandpur distrik.
Ka tnad ki kam pohïing ha ka kyrwoh khubor ka la ong, “Ki lehnoh ki la pyndonkam da kaba siat khlem daw ïa kawei ka kynhun shipai ha ka shnong Khanpi, kaba jngai kumba 80 km shaphang Sepngi jong ka Churachandpur, kaba don ha Manipur. Ha ka jingïasiat kaba markylliang hapdeng ki shipai ïada bad ki dkhot jong ka kynhun UKNA, saw ngut ki dkhot jong ka kynhun ki la ïap.”
“Kane ka jingkhynra ka dei hadien ki kam thombor ba dang shen da ki dkhot ka UKNA kynthup ïa ka jingpynïap ïa uwei u nongïalam shnong, ka jingpyntieng pynsmiej ïa ki nongshong shnong, bad ka jingpyrshang ban pynthut ïa ka jingsuk jingsaiñ ha ka thaiñ. Kane ka jingwanrah jingjop jong ki shipai ka tnat Indian Army bad Assam Rifles ka la sakhi ba ka long ka jingïada ïa ki paidbah ba lui lui, ban kyndat ïa ki jingsheptieng bad ban pyntikna ïa ka jingsuk bad ka jingshngaiñ ha Manipur,” la ong ka jingthoh. Kumba la sakhi, la ong ba ki lehnoh UKNA ki la kham bun bad kham pynjur ïa ki kam pyntriem ha Churachandpur distrik.
