Chennai, Naiwieng:
Hadien ka rai ba la shim ha ka jingïalang jong baroh ki sengbhalang ha ka sngi U Blei, ka seng DMK kaba bat ïa ka jingsynshar ha ka lah sngi U Blei ka la mudui hakhmat ka Supreme Court ryngkat ka jingkyrpad ban pyndam noh ïa ka Special Intensive Revision (SIR) jong ka Election Commission of india kaba la thmu ban sdang ha kylleng ka jylla Tamil Nadu ha ka 4 tarik u Naiwieng.
Ka dorkhas ka la kynnoh ba katei ka jingleh pyrshah Riti synshar ka thmu ban pynduh ïa ka hok jong ki paidbah da kaba pynrung ïa ka tarik ba la buh beit (2002/2005) bad da kaba weng noh ïa ki kot ki sla kiba ju pyndonkam kum ka Card Rashon, ka PAN Card bad ka Voter ID na ka jingpeit jong ka jingpyntreikam. Ïa kane ka jingmudui yn sa bishar bniah ha ka 6 ne 7 tarik u Naiwieng.
Ha ka affidavit jong u, u Secretary jong ka seng DMK u RS Bharathi u la kynthoh ba ka SIR ka long ka jingpynkheiñ ïa ki hok ba kongsan ba la pynskhem da ka Riti synshar ka ri, kynthup ïa ka jingïaryngkat hakhmat ka aiñ (Article 14), ka hok ban ïaid laitluid bad ban shong ban sah (Article 19), bad ka jingïada ïa ka jingim bad ka jinglaitluid shimet (Article 21).
“Ka SIR kan pynduh pyndam be-aiñ, khlem nongrim bad be-aiñ ïa ki lak ngut ki nongshong shnong ban jied ïa ki nongmihkhmat jong ki, da kaba pynthut ïa ka ilekshon kaba laitluid bad kaba hok bad ka synshar paidbah, kaba dei ka bynta jong ka nongrim jong ka riti synshar,” ong ka jingmudui.
Ha kaba ïadei bad ka por jong ka jingpynlong ïa ka SIR, ka DMK ka la kynthoh ba ka por ban buh ïa ki jingpynshisha ka hap ha ka por shuti Khristmas, bad ka por ban bishar bad pynshisha ka hap ha ka por lehkmen Pongal.
