Shillong, Naiwieng 04
Na ka jingïakhih ba khlem buh por ka Meghalaya Commercial Truck Owners and Drivers Association (MCTODA) da kaba pakhang ïa ki trok kit dewbilat bad clinker naduh ka 27 tarik u Risaw, 2025 halor ka nongrim jingdawa ba ki karkhana pynmih dewbilat ki dei ban ai bai kit katkum ka dor Sorkar kata 9 tyngka 1 km na bynta shi ton ka jingkit bad kiwei pat ki mat na kaba la sdang na Soomer Mihmyntdu Bypass mynta ka la poi sha Mawryngkneng.
Ka jingpoi ka jingïakhih sha Mawryngkneng, East Khasi Hills ka dei hadien ba ka Dorbar Shnong Mihmyntdu ha East Jaiñtia Hills kam shah shuh ban pynlong jingïakhih hapoh u pud u sam jong ka myn ha ka 31 tarik u Risaw, 2025 bad bud pat da ka jingkren na ka liang ka Dorbar Shnong Khliehtyrshi, West Jaiñtia Hills District kaba bthah ïa ka Association ban pynlong jingïakhih sha East Jaiñtia Hills namar katei ka phang jingdawa ka ïadei bad katei ka District ym ha West Jaiñtia Hills.
Ka la don ka jingkhot ïakren da u Shivansh Awasthi, IAS, Deputy Commissioner ka East Jaiñtia Hills ïa ka Association lem kiba mih khmat na ki kompeni pynmih dewbilat ha ka 31 tarik u Risaw, 2025 bad 3 tarik u Naiwieng, 2025 hynrei kine ki jingïakren kim shym la poi shaei-shaei hadien ka jingkynnoh ba ka la don ka jingbyrngem phah kem ïa ki nongïalam ka Association da ki kompeni pynmih dewbilat nalor ka jingphah mih khmat kine ki kompeni da ki briew ki bym don ka bor ban shim rai halor ki mat jingdawa.
Ha ka jingïaid ka jingïakhih ha Mawryngkneng ha ka 4 tarik u Naiwieng, 2025 ha ka por janmiet, ki bor majistor ka East Khasi Hills ki la hiar sha katei ka jaka ban ïakren bad ki nongïalam ka Association ha kaba ki nongïalam ba kynthup ïa u Bah Mosklandar Marngar, President bad kiwei ki nongïalam ka MCTODA na Jaiñtia Hills ki la kren shai ba ka jingïakhih kam dei ba ki mut wanrah jinghuri-hura hynrei ban ïoh ïa ki mat dawa jong ki.
Ïa kane ka jingïakhih la wan ai jingkyrshan da ki nongïalam ka HANM Jaiñtia Hills bad kiwei-kiwei kiba la pynsngew ba ka dei kaei-kaei kaba shong nongrim.
Shuh shuh ki trai bad nongñiah trok ki la pynpaw ba ka jingban beiñ ki kompeni pynmih dewbilat ka long shaba palat bad kin dawa beit ba ka dor bai kit ka dei ban treikam ym tang ha ka Jylla namar kan long kumba khñiot ïa ki paradoh parasnam lajong.
