Shillong, Naiwieng 04
Ka Myntri Sorkar barim bad MLA ka NPP na East-Shillong, ka Dr. Mazel Ampareen Lyngdoh ka la shah thung kum ka nongai buit jong ka Sorkar Meghalaya Democratic Alliance (MDA).
Ka Dr.Ampareen kan ïoh ïa ki jingmyntoi bad ki jingdonkam hapoh ka kyrdan “A+”, katkum ka dorkhast jong ka ophis tnad pla tyngka jong ka 17 tarik u Nailar, 2023.
Ïa kane la pyntip da u Commissioner & Secretary ka tnad Planning, Investment Promotion & Sustainable Development, Bah C.V.D. Diengdoh ha ka jingpynbna ba la pynmih ha ka 3 tarik Naiwieng.
Kane ka jingthung ka long hadien ba la pyndam noh ïa ka jingpynbna haba ïadei bad ka jingthung ïa u Myntri Rangbah barim ka Jylla, u Dr. D.D. Lapang, hadien ka jingkhlad noh jong u.
Ka Dr. Ampareen, ka ‘riew saiñpyrthei kaba la shemphang bha ha ka kam, ka la shakri kum ka Myntri ha ka Sorkar Jylla, bad bat ruh ïa ki tnad treikam kum ka rep ka riang, ka koit ka khiah, bad ka tnad Information & Public Relations.
