Shillong, Naiwieng 04
U nongïalam ka UDP uba dei ruh u Myntri Sorkar, Bah Lahkmen Rymbui u la maham ha kaba ïadei bad ka jingthaw ïa ka Kynhun bathymmai (Regional Front) na ka bynta ka Thaiñ Shatei Lam Mihngi, da kaba pynpaw ba ka jingthmu ba hakhmat eh jong ka seng ka long ban ïada ïa ki hok bad ka jingmyntoi jong ki trai-ri trai-muluk ka Jylla Meghalaya.
“Kum ka UDP, ka jingthmu ba kongsan jong ngi ka long ban ïada ïa ki hok jong ki paidbah ka Meghalaya bad ban pyntikna ïa ka roi ka par jong ka Jylla,” la ong u Bah Rymbui.
U la bynrap ba ka seng kan sa khmih bniah ïa ki nongrim bathymmai jong ka Kynhun, ki prokram, bad ki jingthmu jong ka hashuwa ban ong eiei halor kane ka bynta.
U Bah Rymbui u la pynpaw ruh ba ka jingmyntoi jong ki trai-ri trai-muluk jong ka Meghalaya ka long kaba kongsan tam, khlem da kheiñ la katei ka Kynhun ka dei kaba khmih ïa ka thaiñ ne ka ri.
“Ngi hap ban peit lada la thaw ïa ka, kumno la thaw ïa ka, kaei ka jait kynhun, kaei ka jingmut bad nongrim jong ka,” u la ong da kaba kdew ba ka UDP kan shim ïa ka sienjam ban ap bad peit shuwa ïa ka jinglong-jingman.
