Shillong, Naiwieng 05
Ka Bayern Munich bad ka Liverpool ki la ïoh ïa ka jingjop ha ka lympung ïalehkai Champions League ha ka sngi Balang, ha kaba ka Bayern ka la jop da 2-1 ïa ka Paris Saint-Germain bad ka Liverpool ka la pynliem ïa ka Real Madrid da 1-0 kol.
Ha kane ka jingïakhun u rangïalehkai ka Tottenham u Micky Van de Ven u la thep marwei ïa ka kol ha ka jingjngai kaba 90 meter, katba ka Arsenal ka la pynneh ïa ka rukom ïalehkai da kaba jop ïa ka Slavia Prague da 3-0 kol.
Ka Bayern Munich ka la pyni ïa ka jinglah jong ka da kaba jop da 2-1 kol ïa ka PSG, kaba la bteng ïa ka jingjop jong ka sha ka 16 tylli ki jingïalehkai. U Luis Diaz u la thep arsien na ka bynta ka Bayern hashwa ba un ïohpdiang ïa ka red card.
Ka Liverpool ka la jop pyrshah ïa ka Real Madrid ha Anfield bad kane ka la wan urlong lyngba ka shi kol ba la thep da u Alexis Mac Allister ha ka minit kaba 61. U rangïalehkai barim ka Liverpool, u Trent Alexander-Arnold, u la mad ïa ki jingshah kren beiñ ha ki nongkyrshan ha la ïing.
Kumba ka paw ka Arsenal bad ka Bayern Munich ki danglong ki kynhun kiba la ïoh bun point hadien ki saw tylli ki wat jingïakhun. Kane ka jingjop jong ka Arsenal ka kynthup ïa ka por kaba kongsan bha namar u Max Dowman uba dang 15 snem ka rta u la kylla long u rangïalehkai ba dang khynnah tam ha ka histori jong ka Champions League.
U rangïalehkai ‘dien ka Totten -ham, u Van de Ven, u la lah ban ïalehkai bha na ka bynta ban pynliem ïa ka FC Copenhagen da 4-0 kol.
“Ka la long kum u Lionel Messi uba la kylla long kum u rangïalehkai ‘dien” la ong u Thomas Frank, Manager ka Tottenham.
Ka jingjop jong ka Bayern ha Paris ka wan ryngkat bad ka jingjop bad ka jingshah rem. Ki ar tylli ki kol jong u Diaz ha ka minit kaba saw bad kaba 32 ki la pynlong ïa ka Bayern ban lamkhmat, une ujuh u rangïalehkai u la ïohpdiang da ka red card hadien ba u la kum pynur ïa u Achraf Hakimi.
Ki jingïakynduh jingeh ka PSG ka la nangkiew hadien ba u rangïalehkai uba la iohpdiang ïa ka khusnam Ballon d’Or, u Ousmane Dembélé, u la mih noh na madan namar ka jingmynsaw. Hynrei u Joao Neves u la lah ban pynphai kylla shi kol na ka bynta ka PSG hashwa ba kan mad ïa ka jingshah rem.
Ka Juventus ka la ïai bteng khlem da lah ban khur jingjop hadien ba ka la ïakhaid mar 1-1 kol pyrshah ïa ka Sporting Lisbon bad kane ka long ka sien kaba nyngkong ïa u Luciano Spalletti ban shimti kum u manager ha ka Champions League. U Maximiliano Araújo u la thep kol na ka bynta ka Sporting, bad u Dušan Vlahovic u la lah ban pynïakhaid na ka bynta ka Juventus.
Ka Atletico Madrid ka la wanphai na ka jingshah rem ha ka Arsenal ha ka jingïalehkai ba la lah, da ka jingjop ha la ïing da 3-1 kol pyrshah ïa ka Union Saint-Gilloise, ha kaba ïa kine la thep da u Julian Alvarez, Conor Gallagher bad u Marcos Llorente.
Ka Monaco ka la khur ïa ka jingjop kaba nyngkong hadien ba ka la pynliem noh ïa ka Bodø/Glimt da 1-0 kol lyngba u Folarin Balogun, uba la thep ha ka kylla step.
Ha ka jingïalehkai hapdeng ka Napoli bad ka Eintracht Frankfurt ki la kut ha ka jingïakhaid hadien ba kim shym la lah ban thep kol, katba ka PSV Eindhoven ka la ïakhaid mar 1-1 kol pyrshah ïa ka Olympiakos.
