Shillong, Naiwieng 05
Ka jingïakhun dohïap ki rangïa-lehkai ka la pynlong ïa ka Megha -laya ban ïakhaid bad ka Goa, ha ka lympung ïalehkai U-23 men’s Col CK Nayudu Trophy (Elite Group), kaba la poi noh artad sha kaba kut ha ka sngi Balang ha madan ïalehkai kriket ka MCA ha Polo.
Kane ka jinglah ban ïakhun dohïap ka long hadien ba ki la lah ban tied jan baroh shi sngi, kaba la khanglad ïa ka Goa ban khur ïa ka jingjop.
Haduh kaba kut jong ka jingïalehkai, u Manish Sharma u la lah ban kamai 80 ron na ki 177 bol ryngkat bad u Sudhir Sahani uba la phai khmat ban ïalehkai 28 bol khlem kamai pat wat tang shi ron ruh, kaba pynlong ïa ka Meghalaya ba kan kamai 194 ron hadien ba la shah pynhap 7 wiket.
Kumban shu pynkynmaw ba ha ka pali wan tied ba nyngkong, ka Goa ka la lah ban kamai haduh 372 ron hadien ba ka la hap baroh ki wiket jong ka.
Ka Meghalaya kaba la wan ba kan sdang ïa la ka pali wan tied kaba ar na ki 18 ron, ka la duh noh shi wiket kata u Avinash Rai (8) ïa kaba la bynrap sa ka jinghap wiket u Dipankar Baruah (2), Sachin Kumar (31) bad u Kevin Christopher (32).
Katba kitei ki wiket ki la ïai bteng ban hap uwei hadien uwei, u Manish u la long u nongshan ba radbah ban ïakhun dohïap ban pyllait ïa la ka kynhun na ka jingshah rem. Te kumta u la lah ban kamai 65 ron ha ka jingïatied lang bad u Kevin na ka bynta ka wiket kaba san, hashwa ban wan tied sa u Shavian Blah, kaba la ïarap ïa ka kynhun.
Kumba ka long mynta kane ka lympung kan sangeh shipor, ha kaba kan sa sdang biang haduh u Kyllalyngkot jong u snem 2026, hynrei kane ka juh pat ka kynhun ïalehkai ka Jylla kan bunkam ba kan pynkhreh pat ba kan mihkhmat sha ka lympung ïalehkai jong ka BCCI State A Trophy 2025-26, ha kaba ka jingïakhun ba nyngkong kan long pyrshah ïa ka Sikkim ha ka 9 tarik mynta u bnai ka ban long ha Punjab.
