Shillong, Naiwieng 05
Ki khun ki hajar ka Hima Sohra da ka jingsngewsih sngewdiaw namar ka jingduh noh ïa u Syiem ka Hima ha ka sngi Balang, da ki hajar ngut ki la wan tuid sha ka jingleh burom ba khatduh ïa ka met ba sah u Freeman Sing Syiem.
Ha shuwa ban rah ïa ka met sha ka jaka thang Syiem kaba la khot “Ka Kpep ki Syiem Sohra” ka Hima Sohra ka la pynlong ïa ka jingleh burom ba khatduh ïa u Syiem ha madan Marai-Kaphon, wat hapdeng ka jingkah dum u lyoh bad slap ka bneng, da ki hajar ngut ki khun ki hajar ka Hima Sohra ki la wan sngewlem ha katei ka jingïalang.
Ha kane ka jingleh burom la donlang u Païem Ainam Manik Syiem u Syiem ka Hima Mylliem, u Syiem ka Hima Bhowal, u Lyngdoh ba mihkhmat na ka Hima Khyriem, u Bah Gavin Mylliem MLA ka Sohra, u Bah Titosstarwell Chyne MDC ka Sohra, Bah Sanbor Shullai myntri ka Arts & Culture, u Bah Powel Sohkhlet EM KHADC, ki bakhraw batri ka Hima Sohra, ki kur Syiem bad ki khun jong u Syiem Freeman.
Ha katei ka jingleh burom ba khatduh ka Hima ka la pyndep katkum ka niam ka rukom, ka niam ïap ha kaba la don ka shad Shangwiang, ka shad Mastieh bad ka rwai ka phawer ba la pyndep da ki khun ki hajar ka Hima bad hadien jong kane la rah ïa ka met ba sah u Syiem Freeman da ka Lyngkhason bad ka Tabut ba la pynitynnad ban pynpoi sha ka jaka thang Syiem ba la ju tip kum ka “Ka Kpep ki Syiem Sohra” ka ba don ha Pomsohmen.
Ban pyndep ïa ka met ba sah jong u Syiem ba khraw ka Hima donkam ban lam khmat ban ai ding da u Syiem u kmie bad ïa kane ka bynta haba la poi ha ka jaka kyntang ban pyndep ïa ka niam ïap, ka nguh ka dem bad kaba ïaid tyllun laisien laiwad ïa ka met ba la buh halor rynsan bad ba la lamkhmat da u Marremdor Syiem u ba dei u syiem ba thymmai bud sa ki bakhraw batri ka Hima, hadien nangta ka rwai ka phawer bad khatduh u Marremdor Syiem u la lamkhmat ban ai ding ïa ka met kaba dei ban pyndep katkum ka niam ka rukom jong ka hima bud sa ki bahaïing hasem, ki kur, kiba ïajan bad sa ki khun ki hajar jong ka Hima.
U Bah BV Rymbai uba dei u Secretary ka Hima Sohra u la ïathuh hadien ba u Syiem u la khlad ha ka 31 tarik Risaw ki myntri bad ki bakhraw batri jong ka Hima Sohra ki la shong dorbar haduh 2 sngi lynter kata ha ka 1 tarik bad 2 tarik u Naiwieng 2025 ban ïa pyrkhat kumno ban pynkhuid ïa u Syiem bad la khot ïa ka Dorbar Hima ban ïa phylliew jingmut halor kane bad ka Dorbar Hima ka la pynsngew ba donkam ban jied ïa u Syiem u ban long uba bit ban thang ïa u Syiem bad ka Dorbar ka la jied ïa u Syiem khynnah u Marremdor Syiem ban long kum u Syiem ba thymmai ka Hima Sohra.
U Païem Marremdor Syiem haba kren sha ki lad pathai khubor u la ong ba ka long kaba eh shibun ïa ka Hima ban shim rai kumno ban pyndon burom khatduh ïa u Syiem namar hadien 99 snem sa ioh biang ban pyndonburom ïa u Syiem da ka niam ka rukom, ka riti ka dustur ba la buh da ki longshuwa manshuwa bad da kaba suk ba saiñ la lah ban pyndep ïa ka niam ka rukom kumba la ju leh ha ki por ba mynshwa bad ka la long kaba ïaid beit ïaid ryntih.
U Syiem u la ong ba nangne shakhmat u khmih lynti kumno ban pynneh pynsah ïa ka riti ka dustur ba ju don khnang ba ka Hima kan skhem, kan neh ha ka shongsuk shongshngaiñ ki khun ki hajar bad ka ri bad ka jaidbynriew baroh kawei.
