Shillong, Naiwieng 05
U Symbud Myntri Rangbah ka Jylla u Bah Prestone Tynsong uba dei ruh u State President ka NPP u la ong ba ka jingkynnoh halor ka jingjyllei jong u drok bad kynrei ka jingpang HIV/AIDS naduh ba shimti ka Sorkar MDA ba la pynïaid da ka NPP, ka dei tang ka jingkynnoh seng saiñ pyrthei.
“Ka jingkynnoh ban ong ba ha ka por jong ka Sorkar ba ïalam da ka NPP ba jyllei u drok bad kiew sted ka jingpang HIV/AIDS ka dei tang ka jingkynnoh kwah myntoi jong ki seng saiñ pyrthei bad kiba ju im hi ruh ban leh ne kynnoh,” la ong u Bah Prestone haba kren sha ki lathai pathai khubor ha ka sngi Balang.
U Bah Prestone u la ong, kano-kano ka Sorkar kaba trei bad bunkam, ki jingshah kynnoh kin bun beit, hynrei ïa uba thiah sngi pen-li-pen um don satia uba wad daw. “Shibun ki jingkynnoh bad kynthoh, phi ong ki ‘high level’, ki nongtuh nongthiem. Ngam sngew eiei, ieh u paidbah hi un bishar bad ban tip ba kaei ka jingkylla kaba la wan hadien u snem 2018 naduh ba la shimti ka NPP. Ngin ieh ha ka jingstad u paidbah ban bishar hi, ngim donkam ban rah skong, namar la pynshong ïa ngi hangne ba ngin trei bad ai ka jingshakri kaba bha na kaba bha tam sha u paidbah,” la ong u Bah Prestone.
U Bah Prestone u la pynbna ba ka Sorkar ka dang ïaleh kumno ban ïakhun ban tehlakam ïa ka jingpang HIV/AIDS da kaba wanrah da ka mission-mode kumba la ïakhun pyrshah ïa u drok.
“Ngi la dep ban shong jingïalang ban ïakren kumno ban ïakhun pyrshah ïa ka jingpang HIV/AIDS. Na ka liang jong ka tnat ba dei peit ka dang trei ban wanrah ïa kane ka mat hapoh ka cabinet. Ngi la ïakhun ïa ka jingkynrei jong u drok lyngba ka mission-mode bad ngi kwah ban ïakhun ruh ïa ka jingkiew ka jingpang HIV/AIDS kumjuh ban ïaleh ban tehlakam, da kaba buh da ka por ban tehlakam ïa u khñiang jingpang,” la ong u Bah Prestone.
Ka jingkynnoh ba ka jingpang HIV/AIDS bad jingjyllei u drok ka la nangkiew hapoh ka jingïalam ka NPP ïa ka Sorkar ka dei tang ka jingkynnoh myntoi saiñ pyrthei jong ki seng saiñ hima, u la ong.
“Ym dei ba ngi ong ba ïa kane ka jingpang la pynmih na Meghalaya; hynrei ka wan na kylleng ki ri. Ngi don ka jingkhih mynsiem halor kane hapoh ka Ri India, bad ka long thik kumba kren u President ka US u Donald Trump ba ym dei ka America kaba pynmih ïa kane. Ïa u drok la wanrah na kylleng kiwei pat ki Ri jong ka pyrthei,” u la ong.
