Jowai, Naiwieng 05
Ka jingkyntur pud sha u pud u sam jong ka Jylla Meghalaya ka ju jia na ka por sha ka por hynrei mynta ka kynti pat ka jingkyntur pud ka la jia na ka jingdie jaka jong kawei ka Dorbar Shnong ha ri lum Jaiñtia sha ki riew shimet na Assam.
Kane ka la jia ha ka Shnong Saitsama ha West Jaiñtia Hills District haba ki nongïalam Shnong jong ka Shnong Saitsama ki la die ïa kawei jaka kaba ki kam trai sha ki riew shimet na Assam bad kine ki riew shimet ki la pyndonkam ïa katei ka jaka ban tih maw bad shyiap.
Hynrei katei ka jaka ka dang hap hapoh ka khlaw ne plantation jong ka Jaiñtia Hills Autonomous District Council (JHADC) bad ka kaiphod na ka tnat Forest jong ka Council ka la pynkyndit ïa ka Executive Committee bala ïalam da u Ma Thombor Shiwat.
Kumta ka Executive Committee jong ka JHADC ha ka 4 tarik Naiwieng kala hiar jurip kynsan ha ki artylli ki jaka thung dieng jong ka council ba don ha shnong Saitsama bad Thad-mynri.
Ka EC hapoh ka jingïalam u CEM Ma Thombor Shiwat kala leit ban jurip nyngkong ha shnong Saitsama ha kaba hangne, ka la lap shisha ïa ka jingtih maw bad ka jingdie ïa ka jaka.
Ka EC haba ka kylli bniah na ki nongtrei ha katei ka jaka, ki ïathuh ba ïa kane ka jaka la die da ka Dorbar Shnong Saitsama. Mar mar ka EC kala phah wan ïa ki nongïalam shnong ka Saitsama, haba la wan tang da u Secretary Shnong ryngkat u Manager ba la thung ka shnong.
Haba ka EC ka kylli bniah na u Secretary shnong ka Saitsama, u kam ba kane ka jaka ka dei jong ka Dorbar shnong Saitsama.
U CEM u la pyntip ba ïa u maw ka Dorbar Shnong Saitsama ka la die sha kawei ka kontraktor kaba na Assam kaba pyndonkam da ka Mining Lease na Assam ym na Meghalaya.
Haba u CEM u kylli bniah halor ka jingdie jaka khlem ka jingïoh jingbit na ka JHADC, u Secretary Shnong Saitsama u la jubab pynban, ba ka dei jingleh khnang namar bym ler ka Sorkar Meghalaya ha ki thaiñ khappud.
Halor kane, ka EC jong ka JHADC kala khot hajir ïa ka shnong Saitsama ha ka 10 tarik Naiwieng.
Hadien kane, ka EC jong ka JHADC kala leit jurip sa ha shnong Thadmynri ha kaba hangne ruh la lap ïa ka jingtih maw bad ka jingthung synsar ha ki jaka ka council.
Ka Council kala kurup noh ïa baroh ki maw, ki dieng ba la tih bad pom ha kitei ki ar tylli ki jaka jong ka.
