Jowai, Naiwieng 05
Ka Joint Action Committee (JAC) kaba kynthup ïa ka Jaiñtia Hills Truck Owners Association (JHTOA) bad ka East Jaiñtia Hills Truck Owner & Transporter Association (EJHTOTA) kala rai ban phah beit ïa ki trok jong ka ban bteng ïa ka kit ka bah naduh kane ka sngi bad ruh ban dawa na ka Sorkar Jylla ba ka dei ban pynthikna ba ym dei ban don kano-kano ka jingpynthut ïa ki trok jong ka ha shilynter lynti jong ka surokbah NH-6.
Ïa kane ka rai la shim ha ka jingïalang kyrkieh kaba la long ha ka 4 tarik Naiwieng, halor ka jingbym ïoh lad shuh jong ki trok kit dewbilat bad clinker jong ka ban bteng ïa ka kit ka bah mynta la duna ar taïew, na ka daw jong ka jingïakhih (strike) jong ka MCTODA.
U Chairman bad Secretary JAC Ma Biangshwa Shylla bad u Ma Kyrshan Dkhar haba kren sha ki lad pathai khubor ha ka janmiet sngi Balang kila ong ba ka JAC kam don bynta eiei ruh em ha kane ka jingïakhih jong ka MCTODA, hynrei kaba lyngngoh pat de, ba ki trok kit dewbilat bad clinker jong ka ruh, ki la shah bat lang bad ki jong kiwei pat ki trok.
Ka jingbym ïoh shuh jong ki trok jong ka, mynta la shi taïew tam eiei ban bteng ïa ka kamai kajih, tang na ka daw jong ka jingshah bat ha katei ka jingïakhih jong ka MCTODA, ha ki bynta jong ka surok NH-6, ka la wanrah ïa ka jingduhnong kaba khraw haduh katta ïa ki trai trok bad ki nongñiah kiba don hapoh jong ka lama jong ka JAC, la ong u Ma Biangshwa Shylla.
Nalorkata, u la ong, ka jingdon jong ki jingdawa ba bun jait ba man la ka sngi ha ïing ha sem, sa ka jinghap ban siew ïa ka ram (Installment) trok manla u bnai, bad ruh, sa ba ka por Khristmas bad Snem Thymmai ka la wan mynta, ha kaba kin don shibun ki jingdawa pisa ha ïing hasem. Te, lada kane ka jingshah bat jong ki trok jong ka JAC, ha kane ka jingïakhih, kan dang ïai bteng kumne kan wanrah ïa ka jingduhnong bad ka jingkordit ïa ki trai trok bad ki nongñiah jong ka JAC lem bad ïa ka ïing ka sem jong kitei baroh ar.
Ka JAC ka pynkynmaw, ba hashwa ba ka MCTODA, kan sdang ïa ka jingïakhih jong ka, ka JAC ka la leit kyrpad ïa ki nongïalam jong ka ban ym bat ïa ki trok jong ka JAC, hynrei sngewsih ban ong ba ka MCTODA, ka khlem burom ïa katei ka jingkyrpad jong ka JAC, bad dei na kata ka daw, ka JAC, ka la hap ban shim noh da kane ka rai kaba mynta, la ong ki nongïalam ka JAC.
Kila ïathuh kumba long mynta ki bun bha ki trok jong ka JAC kiba la shah bat ha kane ka jingïakhih jong ka MCTODA tad haduh mynta ruh ha ryngkat ka jingkit kaba khia. “Te, lada jia ba kitei ki mar ba don hapoh jong kitei ki trok ba la shah bat, kin sniew noh, lane shah tuh, lane shah leh kam sniew, mano ban bah khlieh ïa kane? ngi kwah ïa ka Sorkar ba kan pynshai ïa kane,” la ong ki nongïalam ka JAC.
U Chairman ka JAC u la ong katkum ka Notification, 13th Kyllalyngkot, 2020, ka la buh dor, T.9/- shi ton, shi kilometer. Hynrei, na ka jingmih kiwei pat ki daw, lyngba ka Notification kaba ha ka 25th Nailur., 2020, ka Sorkar Jylla ka la kylla biang ïa katei ka dor, da kaba buh T.7 haduh T.11 shi ton shi kilometer. Kumta, kat kumba ka long mynta, hooid, ki trok ki ïaid ha ka dor ba la buh da ka Sorkar Jylla hi, tangba ka dei T.7 shi ton shi kilometer.
Ka JAC ka la ong ruh ba, ha ka jingïadei bad katei ka dor ba la buh da ka Sorkar Jylla, na ka liang ka JAC, mynta ruh, ka khlem shong kli kti, hynrei ka la dawa na ka Sorkar Jylla bad ka JHCMA ban pynkiew ïa katei ka dor bad ïa ka bhah jong ki trok na Jaiñtia Hills, khnang ban ïa-im lang.
“Ngi thied trok na ka bynta ban kamai jakpoh ym ban shu pynïeng dur mot ha ïing lane ha surok lane lynti-syngkien ban ïoh peit kai ki briew. Na kata ka daw, ngi kwah ban pyntip sha ka Sorkar Jylla ba naduh mynta ka sngi, ki trok jong ka JAC, kin mih leit trei noh kum ba ju long man la ka por, bad, ngi dawa jur ruh, na ka Sorkar Jylla, ba ka dei pat ban pynthikna shai da kaba shim ïa ki lad ki lynti kiba donkam katkum ka bor jong ka ban pynthikhna, ba ka ïaid ka ïeng jong ki trok ka JAC lyngba ka NH-6, ka dei ban long kaba ïaid thikna, ba ïaid beit bad kaba long shngaiñ, lym kumta ka JAC kan ym banse ban shim da kawei pat ka lynti kaba tyngeh”, la ong u Chairman ka JAC.
