Shillong, Naiwieng 05
U President ka National People’s Party (NPP) Meghalaya Unit u Bah Prestone Tynsong uba dei ruh u Symbud Myntri Rangbah ka Jylla u la kyntait war halor ka jingpynsaphriang ïa ka khubor lamler ba ka don ka jingïashrut ne ka jingbym ïasngewthuh jingmut hapdeng jong u bad u nongïalam ka seng u Bah Sniawbhalang Dhar, uba dei ruh u Symbud Myntri Rangbah.
U Bah Prestone u la kam ba kane ka jingpynmih khubor ka dei tang ka khubor kaba la shu thaw bad kaba la pynlong rynsan da kiwei pat ki seng saiñ pyrthei kiba don ïa ki jingmut pynthohbria.
Haba kren sha ki lad pathai khubor ha ka sngi Balang, u Bah Prestone u la pynpaw ïa ka jingkyndit halor ka jingmih jong ka khubor kaba la pynphriang ha ki rynsan social media bad ha ki katto katne ki lad pathai khubor, da kaba ong ba kam don satia kano-kano ka jingshisha halor kane ka jingkam ba ka don ka jingïashrut kaba jur hapdeng jong u bad u Bah Sniawbhalang.
Haba pynpaw ba kane ka khubor ka dei ka khubor thok, u Bah Prestone u la ong, “Nga pynshai hangne ba kane kam dei satia kaba dei bad nga sngew ba kane ka khubor ka dei kaba thok lane u ne ka briew ba thoh ïa kane, imat ki lah ban dei kiba la shah pyndonkam bakla ha ki riew shimet kiba don jingthmu myntoi shimet lane ki seng saiñ pyrthei kiba don jingthmu myntoi ïalade bad dei tang U Blei uba tip.”
U la kyrpad ïa ki lad pathai khubor ba shwa ba kin pynmih ïa ki khubor, ki dei ban da pynthikna ba ka long ka khubor kaba shisha, namar kum kine ki khubor ki wanrah ïa ka jingpynsngewthuh bakla ha ki paidbah nongshong shnong ka Rilum Khasi Jaiñtia.
“Nga kwah ban kyrpad ïa ki briew kiba pynmih ïa kum kine ki khubor ba kin da pynshisha shwa ban wanrah hakhmat jong u paidbah, namar kan shu wanrah kai ïa ka jingklumar jingmut namar ka don u pud ïa kiei-kiei baroh. La phi dei na ki lad pathai khubor, na ki seng saiñ pyrthei ki bapher-bapher, ki sengbhalang lane kino-kino ki kynhun kaba phi don, nga sngew ba ngim dei ban ïalehkai kum kine ki kam saiñ pyrthei kiba jaboh lane ki khubor kiba jaboh, naba ka shu wanrah kai ïa ka jingpynklumar jingmut hapdeng ki nongshong shnong jong ka Jylla,” la ong u Bah Prestone.
Shuh shuh u Bah Prestone u la ong ba ka NPP ka dei ka seng kaba pher tam na kiwei pat ki seng saiñ pyrthei namar hangne la shim beit kum ki shi ïing shi sem ym kum ki briew ka seng bad ïa kiei-kiei baroh la ju ïapynbeit da ka jingïasngewthuh bad ki jingïakren.
“Nga la don bad ka NPP la slem bad shwa kane, nga la don ruh bad ka Congress. Ka jingïapher hapdeng ka NPP bad ka Congress ka long ba hapoh ka NPP barabor la kheiñ ïa phi kum shi ïing shi sem ym kum ki briew ka seng. Kane ka dei ka jingitynnad jong ka NPP. Naduh u National President, State President, District President lane ki Block bad Unit President bad dkhot jong ka NPP la shim beit kum ki shi ïing shi sem. Lada ngi don kaei- kaei, kaba ngim ïa sngewthuh lane kiei-kiei kiba shu saphriang kum ki khubor khlieng tyngab, ngi shong bad wan sha ka miej ban ïa pynbeit,” u la ong.
