Kane ka dei ka jaka leh niam ki riewngeit Muslim kaba don ha South West Khasi Hills District ka Meghalaya. Ka don hajan khappud Border bad ka Bangladesh hajan ka shnong Nolikata. Ha kane ka jaka ka don ka jingleh niam man la u snem ha u bnai March (Lber) jong u snem da ki riewngeit Muslim khamtam kiba wan na ri Bangladesh na ka East Pakistan mynshuwa. Kane ka dei ka jaka kaba la don uwei u kynja riewkhuid (Muhammad) ki Muslim ula wan iuhkjat na kane ka jaka ha ki por mynshuwa (ki spah snem). Kumta kane ka jaka ka ïai sah kum ka jaka mane Blei jong ki Muslim haduh kine ki sngi ruh. Kane ka jaka ka hap hapoh ka Hima Mawiang. Lada phi leit sha kane ka jaka phi hap ban leit lyngba ka Ranikor kaba long ka Civil Sub Division ka South West Khasi Hills District.
C. B. Iawphniaw
