Bhopal, Naiwieng:
Ka kynhun Special Investigation Team (SIT) kaba tohkit ïa ka jingjia ba sngewsih kaba la mih na kaba dih ïa ka dawai jyrhoh kaba la shim ïa ka jingim jong ki 24 ngut ki khynnah ha Madhya Pradesh, ka la kem ïa ka kurim jong u Dr Praveen Soni uba shah kynnoh, ong u heh sorkar ha ka sngi Ba-ar.
U Dr Soni, uba sah ha Chhindwara, u la shah kem ha u bnai ba la dep, namar ka jingbym shimkhia, hadien ba u la ai dawai jyrhoh kaba la long bih ka Coldrif, sha ki katto katne ngut ki khynnah kiba pang, kiba hadien ki la ïap noh, namar ka jingpang jyrhoh ha kaba ka la ktah ïa ki khyllai jong ki.
Ka kurim jong u, ka Jyoti Soni, kawei pat kaba shah kynnoh ha kane ka jingjia, ka la shah kem ha ka miet jong ka lah sngi U Blei na ka ïing sah jong ka ha ka nongbah Parasia jong ka Chhindwara distrik, ong ka khubor jong u Sub-Divisional Officer of Police uba dei ruh u SIT in-charge u Jitendra Jaat.
Ka dei ka trai jong kawei ka dukan dawai na kaba la die ïa ka dawai jyrhoh sha ki katto katne ngut kiba la ïap, la bynrap shuh shuh une u heh sorkar.
Haduh mynta, la kem hynñiew ngut ki briew ha kaba ïadei bad ka jingjia ba sngewsih.
Hadien kine ki jingïap, ka sorkar Tamil Nadu ka la weng noh ïa ka license jong ka kompeni shna dawai jyrhoh, ka Sresan Pharma.
Kiba la shah kem ki kynthup ïa u trai jong ka Sresan Pharma, u G. Ranganathan, u nongmihkhmat jong ki nongsumar, u Satish Verma, u K. Maheshwari, u nongdie dawai, u Rajesh Soni, u nongdie dawai, bad u nongdie dawai u Sourabh Jain.
Kumba la ïathuh ka tyllong khubor, la ong ba ki la don baroh kumba 24 ngut ki khynnah ha Madhya Pradesh, ha kaba kham bun na ki ki dei kiba dang don ha ka rta kaba san snem, ki la ïap namar ka jingsuba ba ki khyllai jong ki ki la sniew namar ka jingdih ïa ka dawai jyrhoh Coldrif.
Kumba lai ngut kiwei pat ki la ïap na kum kine ki juh ki jingjia ha ka jylla ba marjan ha Rajasthan.
Shuh shuh kane ka jingjia, ka la pynlong ïa ka World Health Organisation (WHO) ba kan pynmih ki jingmaham pyrshah ïa ki lai tylli ki jait dawai jyrhoh ba la ithuh ha India, ka Coldrif, Respifresh TR, bad ReLife.
Kane kaba la shahkem ka dei ka trai jong kawei ka dukan die dawai na kaba la die ïa ka dawai jyrhoh sha ki katto katne ngut kiba la ïap, la bynrap biang une u heh sorkar.
