Khliehriat, Naiwieng 05
Ka Rymbai Shkenshynriah SC bad ka Sutnga SSCC ki la khur ïa ka jingjop ha ka lympung ïalehkai Super Dvision Football Tournament (5th Kyrmen Shylla Contribution Trophy) ba la pynïaid da ka East Jaiñtia Hills District Football Association (EJHDFA) ha ka sngi Balang ha madan artificial turf Diengshynrum, Khliehriat.
Ha ka jingïalehkai kaba nyngkong, ka Rymbai Shkenshynriah ka la pynliem noh ïa ka Dhana CSC da 3-1 kol. Ïa ki kol jong ka Rymbai Shkenshynriah la thep ar kol da u Goldenson Japui ha ka minit kaba 43 & 58, katba ïa kawei pat la pynbud da u Sumar Bareh (61). Na ka liang ka Dhana ka la pynphai kylla shi kol lyngba u Rimonlang Sumer (67) hashwa ban kan mad ïa ka jingshah rem.
Haba phai sha ka jingïakhun kaba ar, ka Sutnga SSCC kala jop da 4-1 kol ïa ka Chiehruphi SYWSC. Ïa kine la thep da u Ker Syrti ha ka minit kaba 13, kumjuh u Sauni Phawa (14), Niponghi Sumer (75) bad u Deligent Pdang (89). Na ka liang ka Chiehruphi ka la pynphai kylla shi kol lyngba u Regency Lapasam (37).
