Shillong, Naiwieng 05
Ka Jylla Meghalaya ka la khur ar tylli ki takma rnong ha ka 69th National School Games Boxing Championships kaba la long ha Arunachal Pradesh kaba la sdang naduh 28 tarik u Risaw bad ka la poi sha kaba kut ha ka 3 tarik mynta u bnai.
Kane ka la wan lyngba ka Ekyrpang Sohïong hadien ba ka la shah rem noh ha ka semi final jong ka kyrdan ïalehkai 48kg ha ka nongïakura jong ka CBSE ka Nischal Sharma bad ka Evangellyne Sohbar kaba la shah rem ha ka semi final jong ka 50kg ha ka nongïakura kaba na Haryana ka Manvi.
Haba phai sha ki rangïakura ka Jylla, u Kyrshan Swer ha ka 48kg bad u Bitdor L Mawnai ha ka 57kg ki la shah rem noh ha ka quarter final bad ki la duh ban khur takma ha kane ka lympung.
Ha kane ka rynsan ïakura ka Jylla ka la phah 13 ngut ki nongïakura ba kynthup ïa 9 ngut ki shynrang bad 4 ngut ki kynthei.
