Shillong, Naiwieng 05
U Symbud Myntri Rangbah ka Jylla, Bah Sniawbhalang Dhar u la kyntait ïa ki jingkynnoh ba ka don ka jingïapher jingmut hapdeng jong u bad u para Symbud Myntri Rangbah ka Jylla, Bah Prestone Tynsong, da kaba ban jur ba ki ïatylli bad ki ïatrei kum ka kynhun, kaba ïatylli lang kawei.
Haba kren sha ki nongthoh khubor ha ka Sngi Balang, u Bah Dhar u la kdew ba ki khubor kiba pynpaw ba ka don ka jingïapher jingmut hapdeng jong ki, ki long ki bym don nongrim bad u la dawa panmap ruh na ki lad pathai khubor kiba donkti ban pynmih ïa kum kine ki khubor.
“Ngi ïatylli bha, ngi long kawei,” la pynskhem u Bah Dhar bad bynrap ba ma u, u Bah Tynsong, bad u Myntri Rangbah ka Jylla, u Conrad K. Sangma ki ïatreilang hapdeng ka jingïatylli bad ka jingsuk.
Haba batai shaphang ka Sorkar NPP, u la ong ba ka long kum ka “longïing kaba heh bad kaba kmen”, ka bym don jaka ïa ka jingïashrut hapoh jong ka.
Ha kaba ïadei bad ka jingsam ïa ka tiket ka seng na ka bynta ka ilekshon 2028, u Bah Dhar u la ong ba ka dang kloi eh ban ïakren ïa kane ka kam bad ong ba ka jingpynleit jingmut ka dei ban long halor ka roi ka par bad ym ïa ka saiñ pyrthei ilekshon ha kane ka por.
“Kane kam dei ka por ban ïakren shaphang ki tiket, ngi dang don palat ar snem shiteng na ka bynta ka ilekshon,” u la ong bad bynrap ba kam don kano-kano ka jingthmu ban pynduh tiket ïa ki MLA kiba mynta.
Shuh shuh u Bah Dhar u la pynpaw ïa ka jingkyrmen skhem ha ka NPP, da kaba ong ba ka seng ka la pynkhreh ban jop ha ryngkat ka jingbun paid kaba marwei ha u snem 2028, da kaba pynpra ïa ki rekod kumba ka la leh ha ki por ba la dep.
“Ym don ka seng haduh mynta kaba la ïoh 33 ngut ki MLA, tang ka NPP. Ngi ju pynpra ïa ki rekod bad ngin sa pynpra ruh ha u snem 2028 ha ryngkat ka jingbun paid kaba marwei,” u la ong.
