Guwahati, Naiwieng:
Kum ka jingkynthoh kaba jur hadien ka jingrung ba pura jong u sha ka Assam Jatiya Parishad (AJP), u MP barim u Rajen Gohain u la kynnoh ïa ka seng Bharatiya Janata Party (BJP) ba ka la pynkylla ïa ka Assam sha ka “jylla ba la pynïaid da ki pulit” bad pynïaid ïa ka “jingsynshar donbor kaba kum u Hitler.”
U nongïalam ba la rim bha u la ong ba ki paidbah ka Assam ki la aiti noh ïa ka jingsynshar jong ka jylla sha ka Delhi, da kaba duh noh ïa la ka jong ka sur bad ka jingsynshar hi.
“Nga la ïohi ïa ka jingsynshar jong kiba bun ki seng riewlum. Ka sngew kumba ngi la aiti ïa la ka jong ka jylla ha ka kti jong ka Delhi”, la ong u Gohain bad bynrap ba ka BJP, ha ka jaka ban pynkhlaiñ ïa ka imlang sahlang jong ka Assam, ka la kylla long ka “nongshun ba khraw tam jong ka.”
U Gohain u la sngewsih ba ka sorkar BJP ka la pynjari ïa ka rukom treikam kaba donbor. “Ïa ka mashin synshar baroh kawei la pyndonkam da ka BJP na ka bynta ka jingmyntoi jong ka”, u la kynnoh.
Haba ïaroh ïa u nongrwai ba la khlad noh u Zubeen Garg, u Gohain u la ong, “U Zubeen u la ong ba ki lyngkha bad ki ïew ki hat jong ka Assam ki dei ban wan ha ka kti jong ngi. Ngin ïaid shakhmat bad ki jingthmu jong u. Ym don ka jaidbynriew kaba lah ban kiew shaphrang da kaba iehnoh ïa ki lyngkha.”
U la kynnoh ba ki seng riewlum ki ailad ïa ki briew kiba nabar ban shim ïa ka jaka bad ki marpoh khyndew jong ka Assam.
U MP barim jong ka BJP, uba la mihkhmat ïa ka Nagaon ha Lok Sabha, u la ong ba ka seng ka la “pynjah burom ïa ki nongtrei ba la slem jong ka” bad ba kito kiba don ka jingburom ïalade ki dei ban mih noh bad “ïasoh bad ki bor thaiñ kum ka AJP bad AGP.”
Watla u pynpaw ïa ka jingïapher jingmut jong u bad ka Congress, hynrei u Gohain u la ong ba u plie lad ïa ka jingïateh lok “namar ka jingburom ïa ka jingkhot jong ka por.” “Ym baroh kiba don ha ka Congress ki long kiba sniew. Kito kiba la leh sniew ha ka Congress mynta ki ïalam ïa ka BJP”, u la kynthoh.
U la kam ruh ba ka BJP ka la thung ïa u khun jong u, u Nabarun Gohain, ha ka kam “da kaba pyrkhat ba ki lah ban synshar ïa u kpa jong u,” bad u la kyntu ïa u khun jong u, ba un mih noh na ka seng.
U Gohain u la kynthoh shuh shuh ïa u Myntri Rangbah ka Jylla u Himanta Biswa Sarma halor ka jingleh jong u ïa u nongrwai ba la khlad noh u Zubeen Garg. “Lada u Myntri Rangbah ka Jylla u la pyni wat tang khyndiat ruh ka jingsngewbha ïa u Zubeen, te haba u Zubeen u la pyrshah ïa ka jingshah pom dieng, un jin da la pynsangeh noh ïa kata ka projek, u Zubeen u la shah kthong haduh ka khyllip mat jong ka jingïap namar ki briew kiba don ha ka jaitbynriew ba kham halor kiba don sawdong jong u”, u la ong.
Kane ka jingkren jong u Gohain ka la mih tang hadien ba u la rung sha ka Assam Jatiya Parishad, kaba pyni ïa ka jingkhlad noh jong u na ka BJP bad ban pynïasoh ïalade bad ki bor jong ka thaïñ hashwa ka ilekshon ban wan.
