Nongstoiñ, Naiwieng 05
Ka kynhun ki Rangbira ka Dommyntong ka la khur ïa ka nam lahduh ha ka Rongbiria ba la pynlong da ka Lai Lyngdoh Archery Sports Association ha sngi Balang ha madan Kharbani hapoh ka shnong Jaidoh, West Khasi Hills.
Ka jingthmu jong kane ka synjuk ka long shi bynta ban kyntiew shuh shuh ïa kane ka jingïalehkai ïa kaba mynta kiba bun ki la sdang ban klet noh.
Ïa ka kyrdan ba-ar la ïoh da ka T.P Jaitdoh bad balai ka D.Nongkseh- Mawkhar, katba ka W.J.Marang ka la wan ha ka kyrdan kaba saw.
Ha kane lympung ïakop siatkhnam ki la don haduh 16 tylli ki kynhun jong ki rangbiria na katei ka thaiñ kiba la wan ban ïashim bynta.
La ïadon lang ha kane ka sngi da u Bah Egenstar Kurkalang, NPP Farmer Front State Unit kum u kongsan, ha ryngkat u Sordar ka shnong Marang Jaitdoh u Bah Wilfred Kharmaw, u Bah V.D.S. Rymbai, Commandant ka 4th MLP BN, Bah Maiantis Mawlot uwei na ki riew rangbah ka thaiñ Nongstoiñ bad kiwei kiba la sam ïa ki khusnam sha ki nongjop.
