Palestine, Naiwieng:
Ka Israel ha ka Sngi Nyngkong, ka la pynphai biang noh ia ki 45 tylli ki metiap jong ki nong Palestine sha Gaza, ha kaba, ka jingdon jong kiba ka Israel ka la pynphai noh sha Gaza ka la long 270 ngut baroh.
Hapoh ka jingïateh kular ban sangeh ïasiat ba la pynïasuk da u President jong ka America, u Donald Trump, ka Israel, ka dei ban aiti noh ïa ki metïap jong ki 15 ngut ki nong Palestine, naka bynta kawei pa kawei ka metïap Israel, kaba la dep pynphai da ka Hamas.
Hadien ka jingithuh da ki bor aiñ, ka Israel ka la pynthikna ha ka Sngi Nyngkong ba ki metïap ba la aiti da ka Hamas ha ka sngi hashwa, ki dei jong ki 3 ngut ki nongshah rahbor ba la rahbor da ki lehnoh Hamas jong ka Palestine naduh ka 7 tarik u Risaw 2023, ka jingleit thombor jong ka Hamas ia ka Israel, kaba la wanrah ïa ka thma kaba jur hapdeng jongka bad ka Israel.
Katei ka metiap ka dei jong u Captain uba dei u nong America-Israel, U Omer Neutra, uba dang 21 snem ka rta, ha ka por ba u la shah rahbor noh na Israel ha ka ba sdang jong , u Corporal Oz Daniel, 19 snem ka rta, bad u Colonel Assaf Hamami, 40 snem ka rta, uba dei u ophisar ba heh tam, uba la shah pyniap ha ka kynhun lehnoh Hamas.
Ka kynhun shipai jong ka Hamas ka la ong ba ka la lap ïa kitei ki shyieng kham mynshwa ha ka Sngi U Blei ha ka lynti jong kawei na ki thliew ha ka phang Shathie jong ka nongbah Gaza.
Ka Hamas ka la bat ia 48 ngut ki nongshah rahbor ha Gaza ha ka por ba ka jingiateh kular ka la treikam ha ka 10 tarik u Risaw, kynthup ia 20 ngut kiba dang im haduh mynta.
Naduh ba sdang ka jingïateh kular, ka Hamas ka la pyllait ïa ki 20 ngut ki nongshah rahbor kiba dang im bad sdang ban aiti ïa ki met ïap jong ki 28 ngut ki nongshah rahbor kiba la ïap.
Na kine kiba hadien, haduh mynta ka la pynphai 20 ngut, ba kynthup ia 18 ngut ki nong Israel, uwei u nong Thailand bad uwei u nong Nepal.
