Belgium, Naiwieng:
Katkum ki khubor, la ong ba baroh ki liengsuiñ na ka Kad Liengsuiñ ka Belgium, ki la shah pynsangeh noh hadien ba la iohi ia ki kynja liengsuiñ rit kiba her bad syntiat nalor suiñ kum ki ‘drone’.
Kumta la ong ba ym shym la shah shuh ia kino- kino ki liengsuiñ ba nabar ruh ba kin wan poi ha katei ka nongbah namar ka jingma kaba ap ia katei ka Kad Liengsuiñ lada dei shisha ba don ki drone kiba syntiat.
La pynsangeh ruh ïa ka jingïaid liengsuiñ kum ka jingïada ia ka Kad Liengsuiñ kaba ar kaba heh tam ka Charleroi, la ïathuh ki nongpynïaid na katei ka nongbah.
Watla katta, ym shym la pynshai bniah ha kaba iadei bad ka jingkheiñ por jong ki jingpynthut.
Ka Skeyes, ka kompeni kaba dei khmih ia ka jingpyniaid ia ka leit ka wan jong ki liengsuiñ ha Belgium, kam shym la jubab mardor ia ka jingkylli jong ki nongthoh khubor ban ai jingpynshai halor katei ka jingjia.
Kine ki jingpynthut ki long hadien ba la mih dang shen ba ki drone kiba la thmu ban leit htombor ïa ki Kad Liengsuiñ bad ki jaka treikam ba kongsan jong ki shipai ha ki katto katne ki ri Europe, kynthup ïa ka Germany bad ha Denmark.
Ha ka taiew ba la dep, ki bor synshar jong ka Belgium, ki la pyntip ïa ka jingleit syntiat jong ki drone halor ki ktem shipai Kleine-Brogel, ha kaba la ngeit ba ki don katto- katne tylli ki tiar nuclear jong ka US.
Ki tnat wad bniah jong ki shipai jong ka Belgium, ki la iathuh ba ki dang pynlong ia ka jingtohkit bad ki dang bud-dien halor katei ka jingiohi ia ki drone kiba leit swait bad leit syntiat sha katei ka nongbah.
U Myntri kam poh-ïing ka ri, u Theo Francken, ha ka Sngi Nyngkong, u la kyntait ban kdew kti ia ka Russia, hynrei u la ong ba ka paw ba ka dei ka jingtreilang kaba la pynlong da ki kynhun kiba la shemphang bad shyrkhei bha.
Ki jingsuba ki la pur halor ka jingdonkti lang jong ka Russia ha ka jingpyniar ïa ki kam thombor da ki drone ha kylleng ka Europe, ha kaba ka jingïakynad ka la jur bha katba ka thma ha Ukraine ka dang ïai bteng la 4 snem mynta.
