Shillong, Naiwieng 05
Ka Na Rympei Football Academy, Pay For Right Football Academy bad ka Jakrem, ki long ki lai tylli ki kynhun kiba la buh jaka ïalade sha ka semi final ha ka Meghalaya Women’s State League 2025, hadien ba ki la khur jingjop ha ki jingïakhun quarter final ha ka sngi Balang ha SSA Stadium, Polo.
Ha ka jingïakhun quarter final hynne ka sngi, ka Na Rympei (Ri-Bhoi DSA) ka la pynliem noh ïa ka Bright Future SSCC (Pyndengumïong DSA) da 8-1 kol, katba ka Jakrem (Mawkyrwat DSA) ka la jop da 4-1 kol ïa ka Dieng -shynrum SC (East Jaiñtia Hills District Football Association).
Pynban ka jingïakhun kaba itynnad bad kaba ïakhaid bha ka dei ka nam jop kaba long da 3-2 kol da ka PFR (SSA) pyrshah ïa ka Mawlum Tyrsad SC (Tyrsad Area SA).
Ïa ki kol na ka Na Rympei SC, la thep da ka Pynhun Shulet kaba la khur da ar tylli ki hat-trick hadien ba ka la thep ha ka minit kaba 3, 28, 46, 50, 72 & 90+2, katba ïa kiwei la pynbud da ka Streamlet Taro (9) bad ka Tracy Rympei (78). Na ka liang ka Bright Future ka la pynphai kylla shi kol lyngba ka Blessiful Thongni (68).
Katba ki kol lyngba ka Sunalinda Ïawren (4), Ïaphisha Marbaniang (12), Bahunlang Synrem (32) bad ka Catherine Khar-kongor (83), ka pynlong ïa ka Jakrem ban jop da 4-1 kol ïa ka Deinchynrum. Na ka Deinchynrum la thep da ka Charlinda Nongtdu (72).
Katba sa kawei pat ka kynhun kaba la lah ban buh jaka ïalade sha ka semi final ka dei ka Laitkor SC, kaba la lah ban pynliem noh ïa ka Mawten SC da 10-1 kol ha ka sngi Ba-ar.
Ka jingïakhun ïa ki semi-final ha kane ka lympung la buh ban long ha ka sngi Saitjaiñ ha SAI Training Centre kaba ha NEHU bad ha SSA Stadium, Polo ha ka por 10 baje mynstep.
Ki jaka ba kine ki kynhun kin ïakhun ka long ka Laitkor pyrshah ïa ka Jakrem ha SSA Stadium, katba ka Na Rympei ïa ka PFR ha SAI STC, NEHU.
