Shillong, Naiwieng 05
Saw ngut ki briew ki la shah kem noh ha kaba ïadei bad ka jingkulmar kaba la mih ha Lad Mawryngkneng ha ka step Sngi Balang.
Katei ka jingjia ka la jia ha ka por ba ki pulit ki dang synran ïa ka kynhun ki trok kit dewbilat bad ‘Clinker’ na Puriang, ha kaba la khanglad da kumba 200 ngut ki briew, khamtam ki dkhot jong ka Meghalaya Commercial Truck Owners and Drivers Association (MCTODA).
Ha kane ka jingïakhih nalor ki saw ngut kiba la shah kem, bun ngut ki la mynsaw na ka jingpyndonkam ki pulit da ki bom lyer pynsat khmat (tear gas) bad bom lathi ban pynpra ïa ki paidbah kiba pynlong jingïakhih ha Mawryngkneng.
“Kumba 4-5 ngut ki briew ki la shah kem”, la ong u Symbud Myntri Rangbah ka Jylla, Bah Prestone Tynsong haba kren sha ki nongthoh khubor da kaba pynpaw ba lah ban kem shuh lada donkam.
“Ngi la aiti ïa kane ka kam sha ki bor distrik bad ki pulit ban leh ïa kaba donkam katkum ki aiñ,” ong u Bah Tynsong.
U la ong ba ki nongïakhih kiba khang lynti ïa ki trok ki pyrshah ïa ka jingbym pyntreikam jong ki kompeni pynmih dewbilat ïa ki dor Sorkar. Ki bor distrik ka East Jaiñtia Hills ki la khot ïa ki jingïalang, bad ki kompeni pynmih dewbilat ki la mynjur ban bud ïa ki dor ba la pynbna da ka Jylla hapoh u pud u sam ka Meghalaya.
“Hynrei ngim lah ban pynbna ïa ki dor shabar u pud u sam jong ka Jylla jong ngi, namar ba ka dei ka aiñ ka Sorkar Pdeng. Ki nongïakhih ki kyntu jur na bynta ki dor shabar ka jingkhmih jong ngi, ka bym lah ban leh,” la ong u Bah Tynsong.
U Bah Tynsong u la kyrpad ruh ïa ki nongïakhih ban pynkylla ïa ka sienjam jong ki, da kaba kyntu ïa ki ban ïakren bad ki bor distrik, ban ïa kaba pynthut ïa ka jingïaid ki kali ha shilynter ka surokbah.
Ha kajuh ka por, u la maham ba yn ym shah satia ïa ki jingkhang khyrdep kiba ïai bteng, bad ki pulit kin sa shimkhia ïa kane ban pynneh ïa ka shong suk shong shngaiñ.
“Ka jingleh jong ki pulit ka thmu ban pynsngew ba ka jingïakren ka donkam ïa ka sienjam kaba pher; ban pynthut ïa ka jingïaid kali ha surokbah kam long kaba ïahap,” u la bynrap.
