Imphal, Naiwieng:
Ki nongleit nongwan da ka liengsuiñ na Manipur kin sa ïoh katto katne ka jingïarap kaba ki la ap slem bha namar ba ka sorkar pdeng ka la mynjur ïa ar tylli ki jingshakri liengsuiñ kiba thymmai, kawei kawei ha ka lynti Imphal-Guwahati bad Imphal-Kolkata, ban weng ïa ka jingduna ka jingïadei bad ka jingkiew dor jong ki liengsuiñ.
U Myntri Rangbah barim ka jylla N Biren Singh u la ïasam ïa kane ka khubor ha ka rynsan X, da kaba kdew ba kane ka rai ka long hadien ka jingïakren hapdeng u MLA Susindro bad u Secretary ka Civil Aviation ha Delhi. Ki heh jong ka tnad ki la pynthikna ba dang shim khia ban pynrung ïa ki liengsuiñ thymmai ha ka por kaba kloi tam.
U Singh u la bynrap ba ka tnad Civil Aviation ka dang trei ruh ban buh dor ïa ka dor liengsuiñ haduh kumba 7 hajar tyngka, ka sienjam kaba la khmih lynti ba kan pynduna ïa ka jingkit kaba khia ha ka liang ka pisa tyngka jong ki nongleit nongwan kiba shah ktah na ka jingkiew dor jong ki tiket.
U la batai ïa kane ka rai kum ka jingpynpaw ïa ka jingkular jong ki nongïalam pdeng ban weng ïa ki jingeh ba shisha jong ki paidbah ka Manipur “ha ka por kaba biang bad kaba bha.”
Ha kajuh ka por, u Lat ka Jylla Manipur u Ajay Kumar Bhalla u la thoh sha u Myntri ka tnad liengsuiñ jong ka sorkar pdeng u Kinjarapu Rammohan Naidu, da kaba kyntu ba dei ban shimkhia kloi ban pynïoh biang bad pynjanai shuh shuh ïa ka rukom pynïaid liengsuiñ sha bad na Imphal.
Ha ka shithi jong u, u Lat ka jylla u la pynpaw ïa ka jingsyier halor ka jingpynduna ïa ka jingdon ki liengsuin, da kaba kdew ba ki liengsuiñ kiba man ka sngi hapdeng ka Imphal bad Guwahati ki la hiar na ka san sha ka ar, bad kiba leit sha Kolkata na ka san sha ka ar, khlem da don ki lad ban ïaid mynstep ne janmiet.
