Jowai, Naiwieng 06
Ka Ladthadlaboh bad ka 7 Wasa United ki la ïasam mar shi point ha ka lympung ïalehkai Super Division na ka bynta ka 17th Kiang Nangbah Memorial Trophy ba la pynïaid da ka West Jaiñtia District Sports Association (WJDSA), hadien ba ki la ïakhaid mar 1-1 kol ha ka sngi Palei ha Kiang Nangbah Stadium, Jowai.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei hashwa ban kut ka jingïalehkai jong ka kylla step ka Ladthadlaboh ka la ïoh ban pynkhih jar nyngkong ha ka minit 45+3 lyngba u Rangdajied Sayoo. Katba ka 7 Wasa United ka la ah ban pynphai kylla shwa ba wai lyngba u Arwanki Rymbai ha ka minit 90+4.
Haba phai sha ka jingïalehkai jong ka 1st Women League Football Tournament, ka Ladthadlaboh ka la pynjem khnap ïa ka Spahmariang da 5-0 kol. Ïa kine la thep da ka Ripa Suchiang ha ka minit kaba 14, katba ka Prema War (26 & 55) bad ka Daphimon Khyriem (32 & 43) ki la thep mar ar kol.
