Shillong, Naiwieng 06
U Symbud Myntri Rangbah ka jylla u Bah Prestone Tynsong uba dei ruh u President ka National Peoples’ Party (NPP) Meghalaya State Unit u la ong katba kin dang don kiba kren kynthoh katta kum ka seng kan dang leh bha ban kyntiew ïa ka jylla.
“Ai kin kren katba ki kren. Ngim don eiei ban kynthoh ne ban sngew hynrei ngin trei beit ïa la ka kamram ban wanrah ïa ka roi ka par hapoh ka jylla,” la ong u Bah Prestone haba kren sha ki lad pathai khubor ha ka sngi Balang.
U la ong, “Lada phi kren shaphang ki surok, ka koit ka khiah, ka pule puthi, ki jingtei ba bun jait, ngi la lah ban wanrah shibun eh bad ïa kane, ki paidbah ruh ki la sakhi bad ïohi da la ki jong ki khmat. Kumta ai kin kren katba ki kren hynrei na ka liang jong ngi, ngin ïai trei shitom.”
“Nga ju ïohi bad sakhi ba tang don kiba rung ne pynïasoh sha ka NPP, ka jingkynthoh kaba mih ka long beit ba ka NPP ka thied da ka pisa ïa ki briew kiba rung sha ka. Hynrei ngan ong ïa phi ba kam long kumta bad tang kito kiba rung ki ban phla ïa ka jingshisha namar ki ïohi ïa ka roi ka par,” u la ong.
U Bah Prestone u la ong ba dang ha kine ki taïew, don kiba la rung sha ka Congress, hato lah ban ong ba ki thied ïa u Zenith, hynrei lehse ki don la ka jong ka nongrim ne u Zenith u don la ka jong ka jingpyrkhat. “Ngam don eiei ban ong ne kynthoh ïano ïano ruh namar ha ka ri synshar paidbah ki don ka hok, kano ka seng kaba ki sngew ïajan ïadei ba ki lah ban shim ïa ka rai,” la ong u Bah Prestone.
“Ngam don eiei ban kynthoh hynrei tang kawei ka long ba nga ai ka jingkitbok kitrwiang. Kiwei kiwei pat ki seng ki thiang ngai ngai bad tang shu don kiba pynïasoh sha ka NPP, ki la ong beit ba ka NPP ka thied da ka pisa. Nga sngew khain ba haduh katno kata ka jingriewspah jong ngi kum ka NPP. Ngi don ka mynsiem kaba riew spah bad ban wanrah ka roi ka par ïa ka jylla,” u la ong.
Ha kawei pat ka liang u Bah Prestone u la ong, “Wat hapdeng ki jingeh bad jingduna ba bun, ki jingangnud hi ki long dang trei shitom ban wanrah ïa ka roi ka par ha baroh ki konstitwensi, ki shnong ki thaw. Ngin ïai trei shitom, ym tang na ka bynta ban ïakhun ïa ka ilekshon hynrei ngin trei shitom ban ïohi ïa ka jingkylla jong ka jylla ka jong ngi.”
