Shillong, Naiwieng 06
Ka Inter Milan ka la bteng ban khur jingjop ha ka Champions League hadien ba ka la pynliem noh ïa ka Kairat da 2-1 kol ha ka step jong ka sngi Palei, katba ka Barcelona ka la ïakhaid mar 3-3 kol ha ka Club Brugge bad u Erling Haaland ka Manchester City u la bteng ïa ka jingthep kol jong u ha ka jingïakhun pyrshah ïa ka Borussia Dortmund na ka bynta ban jop da 4-1 kol.
Ka Inter Milan ka la ïasoh bad ka Bayern Munich ryngkat ka Arsenal kum ki kynhun kiba la jop saw sien na ki saw tylli ki jingïakhun. Na ka bynta ka Inter ki la thep da u Lautaro Martinez bad u Carlos Augusto, katba u Ofri Arad u la pynphai kylla na ka bynta ka Kairat ha ka kylla miet.
“Ngi tip ba ngi donkam ban khur jingjop ha ki saw tylli ki jingïalehkai, bad ngi la lah ban leh ïa kata. Ngi hap ban pyrkhat ïa ka jingïalehkai hadien ba la kut ka jingïalehkai, manla ka jingïalehkai ka long kaba eh ha ka Champions League,” ong u rangïalehkai ‘dien jong ka Inter, u Federico Dimarco.
Ka Barcelona ka la mad ïa ka jingeh ha ka jingïalehkai ha Club Brugge, ha kaba ka la wan na dien ban pyntikna ïa ka jingïakhaid. U Lamine Yamal u la thep ha ka minit kaba 61 bad kane ka kynhun ka la ïakhaid lyngba ka jingïarap pynthep da u rangïalehkai ka Club Brugge u Christos Tzolis ka Club Brugge ha ka minit kaba 77.
Ka Manchester City ka la lah ban ïalehkai bha ha la ïing ha kaba u Phil Foden u la thep ar kol bad u Haaland u la bteng ïa ka jingthep kol. U Haaland u la thep ïa ka kol kaba 27 ha ki 17 tylli ki jingïakhun na ka bynta kane ka klob bad kumjuh ïa ka ri ha kane ka samoi ïalehkai.
“Man ka por ba nga wan sha ka jingïalang bad ki nongthoh khubor, ki ai ïa u sa kawei ka rekod,” ong u coach ka Manchester City, u Pep Guardiola, halor ki jingjop jong u Haaland.
Ka Benfica kaba la shah rem ha ka sien kaba saw lynter, ka la shah rem biang da 1-0 kol ha la ïing pyrshah ïa ka Bayer Leverkusen. Ka Ajax ruh ka la bteng ban ïalehkai sniew da kaba ka la shah rem ha ka Galatasaray da 3-0 kol, ha kaba u Victor Osimhen u la ïoh da ka hat-trick kynthup ar tylli ki penalty.
Ka Newcastle ka la pynjop da 2-0 ïa ka Athletic Bilbao lyngba ki kol ba la thep da u Dan Burn bad u Joelinton. Ka Atalanta ka la jop da 1-0 kol ha Marseille ha kaba ïa kane la thep da u Lazar Samardzic, watla u Charles De Ketelaere u la pynlehnohei ïa ka penalty.
Ka Chelsea ka la ïakhaid da 2-2 ha ka Qarabag, katba ka Pafos ka la ïoh ïa ka jingjop kaba nyngkong ïa ka Villarreal da 1-0 kol ha Cyprus.
