Shillong, Naiwieng 06
Ki nongïalam ka Meghalaya Commercial Truck Owner and Driver Association (MCTODA), ki la dawa na ka Sorkar ba kan pyllait noh mardor ïa u President ka MCTODA lem kiwei ki dkhot ba la shah kem, khnang ban lah ban pynïaid shakhmat ïa ka jingïakren bad ka Sorkar.
Haba kren sha ki nongthoh khubor u Bah Moonlight Pyrtuh president ka MCTODA Ri-bhoi District u la ong ba na ka liang ki dkhot ka MCTODA kin ïai-bteng ka jingïakhih tad haduh ba ki Pulit ki pyllait ïa ki nongïalam ba shah kem ka Association ba kynthup ïa u President u Bah Mosklander Marngar, u Bah Teibor Marngar, u Bah Thrangbor Lyngdoh bad u Bah Heibor Pariat kiba la shah kem ha ka step 5 tarik Naiwieng.
Shuh-shuh u Bah Moonlight u la ong ba ka lada ka Sorkar ka kwah ban ïakren sani bha halor ka jingdawa jong ka Association, ka dei ban pyllait mardor ïa ki nongïalam ka MCTODA.
Nalor kata u la ong ba ka Association kam kwah ban mih kano kano ka huri hura namar ka jingïakhih kam dei pyrshah ïa ka Sorkar ne pyrshah ïa ki bor District ne pyrshah ïa ki Pulit, hynrei kane ka jingïakhih jongki ka dei pyrshah ïa ki karkhana dewbilat .
U la bynrap ruh ba ka jingthmu jong ka MCTODA ka long tang ban ioh ïa ka dor kaba ïadei katkum ka jingbthah ka Sorkar.
“Khnang ba kan shai ka jingïakren halor ki mat jingdawa, ka Sorkar Jylla ka dei ban pyllait mardor ïa ki nongïalam ka MCTODA bad lada ki nongïalam kim lait, kum ka Association ngin ïai-bteng ka jingïakhih” la ong u Bah Moonlight.
Ban shu kdew hangne ka MCTODA ka la pynlong ïa ka jingïakhih ha Mawryngkneng naduh ka 3 tarik Naiwieng, da ka ba pakhang ïa ki trok ba kit Cement bad clinker ba ïaid lyngba ka surokbah (National Highway) ban dawa ba ka Sorkar Meghalaya ka dei ban pyntreikam da kajuh ka dor wat shabar ka Jylla ïa ki trok ba kit mar na ki karkhana dewbilat.
