Guwahati, Naiwieng:
U Chief Information Commissioner jong ka Assam, u Bhaskar Jyoti Mahanta, u la iehnoh ïa ka kam jong u, hadien ba la don bun tylli ki jingujor pyrshah ïa u hynmen jong u, u nongseng kam seng jam bad u nongpynïaid ïa ka kolshor, u Shyamkanu Mahanta.
Katkum ki tyllong khubor ba la ïohlum, u Myntri Rangbah ka jylla u Himanta Biswa Sarma u la ai jingmut ïa u Bhaskar Jyoti Mahanta ban hiar shuki halor ka jingshai jong ki aplikeshon RTI kiba pan jingtip kiba ïadei bad ki kam jong u hynmen jong u.
Da kaba pdiang ïa ka jingai jingmut jong u Myntri Rangbah ka jylla, u Mahanta u la phah ïa ka shithi iehnohkam.U Bhaskarjyoti Mahanta uba dei u Director General of Police (DGP) barim ka Assam u la shimti ïa ka kam kum u State Chief Information Commissioner ha kaba sdang jong une u snem.
U Mahanta u dei u IPS ophisar ka kynhun Assam-Meghalaya na ka kynhun jong u snem 1988 uba la bat mynshwa kum u Director General ka Border. U la pawnam bha ruh na ka bynta ka jingshakri kaba radbah bad ka jingaiti lut jong u ha ka tnad pulit jong ka jylla.
Ka jingiehnohkam jong u ka wan hapdeng ka jingkhmih bniah kaba jur bha halor ka jinglong khuid bad ka jingkitkhlieh ha ki ophis paidbah hadien ki jingpynpaw jong ka RTI. Ka sorkar jylla kam pat pynbna ïa u nongmihkhmat ha katei ka kam.
Ka jingtohkit ka dang ïaid shakhmat ban lap la kine ki suba don jingïadei ne em bad ka kynhun khaïi drok kaba kham heh kaba treikam ha kylleng ka thaiñ.
