Shillong, Naiwieng 06
Ki dkhot jong ka Khasi Students’ Union (KSU) kiba don ha sor Shillong bad khapsor ha ka 6 tarik u Naiwieng 2025, ka la phah khang noh bad pynsangeh treikam ïa kiba bun ki ophis treikam kiba don ha Sor Shillong namar ka jingbym burom ïa ka sngi shuti leh ñiam leh rukom kaba shisien shi snem jong ka Hima Khyrim kaba la ju tip paidbah kum ka Shad Nongkrem.
Ha ka kyrwoh ba la phah da u Samla Pynshai Rani u la ong ba ki ophis treikam ba ka seng ka la leit khang ki kynthup ïa ki Bank, ki post ophis, ki ophis jong ki kompani ka la sdang naduh ki thaiñ Upper Shillong, Lumdiengjri, Motphran ter-ter shaduh ki thaiñ Khyndai lad, Keating Road, Laitumkhrah, Nongthymmai, Nongmensong bad kiwei-kiwei de ki dong ki shnong.
“Ka jingleit khang ka KSU ïa kitei ki ophis treikam ka long hadien ba kim shym la burom lem, wat haba la dep pynbna shuti da ka Sorkar Jylla ha kane ka sngi leh ñiam,” u la ong.
U la ong ruh “Kane ka dei ruh ka jingibeiñ ïa ka jinglong kyrpang jong ka jaidbynriew”.
Kumta u la maham tyngeh ïa baroh ki ophis treikam ba nangne shakhmat haba don ki sngi kyrpang jong ka jaidbynriew kum ka lyngkhuh sngi ïap u Tirot Sing, Kiang Nangbah, SoSo Tham, Shad Suk Mynsiem, Sengkut Snem, Behdeiñkhlam, ki dei ban kynmaw kyndiang wat nym ap haduh ba ki dkhot ka seng kin wan phah khang, hynrei ki dei ban sngewthuh kaei ka bynta ba ki dei ban leh ban ñiew burom ïa ki sngi kyrpang ka jaidbynriew.
Nalor kata, u la ong ruh ba lada ki tnat treikam jong ka Sorkar Pdeng lane ki kompani kim tip ne ñiew burom ïa ka sngi kyrpang ka jaidbynriew, kam don jingmut ruh ban buh ïa ki ophis ha kane ka jaka.
